Agjencia Kombëtare e Krimit (NCA) e Anglisë ka hequr 12 mijë reklama në media sociale, të cilat tërheqin emigrantët të kalojnë ilegalisht kufirin, duke iu ofruar 100% garanci.
Sipas medias britanike SkyNews, kjo është një përpjekje tjetër për të penguar bandat e organizuara që përdorin platforma online, që kanë si qëllim të rekrutojnë emigrantët për të kaluar kanalin me varka të vogla apo gomone, ku mes tyre janë edhe shumë shqiptarë.
Ata marrin si shembull edhe një reklamë shqip në TikTok, ku premtohej siguri në kalimin e Kanalit dhe ofrohej para nëse ky “udhëtim” rekomandohej te të tjerët.
“Një plan për të kuptuar se si kriminelët i shfrytëzojnë viktimat e dëshpëruara për të ardhur në Mbretërinë e Bashkuar u lançua në dhjetor 2021 me gjigantët e internetit duke përfshirë X, TikTok, YouTube dhe Meta – pronarin e Instagram, Facebook dhe WhatsApp.
Rreth 3,300 postime, faqe ose llogari u hoqën ose u pezulluan deri në prill të vitit 2023, ndërsa një goditje tjetër gjatë vitit të kaluar ka fshirë rreth 9,000 reklama, një total prej pothuajse 12,000 deri në fund të qershorit.
Një reklamë që shfaq imazhin e dy motorëve të një skafi thotë në shqip: ‘Ne i çojmë njerëzit në MB me skaf. Është një punë e përfunduar brenda 45 minutave.
‘Kalimi është 100% i garantuar. Mos e humbisni këtë mundësi. Së shpejti do të jemi gati të nisemi. Shkruani në privat.’
Një tjetër, tregon një hartë me një vijë të kuqe, që tregon kalimin nga Shqipëria në Kanal, ofron ‘udhëtime 100% të garantuara (të sigurta) me ne’, ndërsa shkruan: ‘Rekomandoni udhëtimet tona mikut tuaj dhe fitoni 500 €’.
Udhëheqësi i NCA-së për kërcënimet e krimit të organizuar të imigracionit, Dan Barcroft, tha: “Mediat sociale janë kyçe për mënyrën se si funksionojnë këto grupe të krimit të organizuar, kështu që këto fshirje kanë një efekt të drejtpërdrejtë në ndërprerjen e operacioneve dhe aktivitetit të tyre kriminal.
‘Ne kemi parë raste kur ata duhet të ndryshojnë taktikat e tyre si rezultat, dhe muajt e fundit kemi ndërmarrë veprime të drejtpërdrejta kundër individëve të dyshuar për postimin e këtij lloji të materialit.’, thuhet më tej në artikull.
