Zv.kryeministrja dhe ministre e Infrastrukturës dhe Energjisë, Belinda Balluku, është paraqitur sot në SPAK, ku është regjistruar si person nën hetim për akuzën e shkeljes së barazisë në tenderat publikë.
Pamela Qirko e KPK do të mbrojë Belinda Ballukun, a është e ligjshme?
Ballukun e përfaqësoi motra dhe avokatja e saj, Pamela Qirko, ish-kryetare e Komisionit të Pavarur të Kualifikimit (KPK), institucioni që dikur shkarkonte gjyqtarë dhe prokurorë për mungesë integriteti. Me firmën e Qirkos janë shkarkuar 56 përfaqësues të drejtësisë.
Ajo që e bën situatën më paradoksale është fakti se Pamela Qirko, përpara se të vishej me roben e avokates, ka qenë kryetare e Komisionit të Pavarur të Kualifikimit (KPK), institucioni që dikur shkarkonte gjyqtarë e prokurorë për mungesë integriteti. Me firmën e saj janë shkarkuar 56 përfaqësues të drejtësisë, ndërsa sot ajo vetë gjendet në prag të një procesi ku drejtësia i prek familjen.
Ndërkohë kreu i opozitës, Sali Berisha ka denoncuar kërcënimin, që sipas tij, Kryeministri Rama i ka bërë prokurorit të SPAK-ut, Dritan Prençi, që heton zëvendëskryeministren Belinda Balluku. Ai tha se Rama e ka telefonuar, ndërsa e cilësoi këtë një akt të rëndë.
Dalja nga SPAK dhe deklarata për median
Gjatë daljes nga SPAK, Balluku iu drejtua mediave me një deklaratë të shkurtër. Balluku konfirmoi edhe vete se shkoi në SPAK pas fletëthirrjes për një çështje që është marrë në hetim, duke thënë se beson se do jetë një proces transparent.
“Në respekt të organeve të drejtësisë, kam pranuar kërkesën e prokurorisë së posaçme për një çështje në hetim. Si qytetare e Shqipërisë dhe zyrtare publike, e shikoj këtë si një proces që shpresoj të bazuar mbi transparencë dhe parimet e drejtësisë.”
Ajo nuk pranoi të komentonte më tej dhe u largua me indiferencë, duke mos iu përgjigjur pyetjeve mbi dorëheqjen ose përballjen me drejtësinë me mandat. Gazetarët e prisnin për pyetje rreth dorëheqjes dhe procedurave që e lidhin me tenderat, por ministrja zgjedhi të qëndrojë e heshtur dhe të shmangë kontaktin. Balluku u paraqit në SPAK në orën 15:10 dhe qëndroi aty deri në orën 16:00.
Hetimi i SPAK-ut, lidhet me procedurat e tenderimeve në institucionet që Balluku ka drejtuar.
Mes kallëzimeve penale që po heton SPAK, përfshihet edhe rasti i tunelit të Llogarasë, ku vlera e tenderit u rrit me mbi 50 milionë euro nga fituesi i kontratës. SPAK ka qenë i rezervuar për detaje, duke theksuar se nuk ka asgjë për të ndarë me median në këtë fazë të hetimit.
Belinda Balluku ushtron funksionin e Zv.kryeministres që prej korrikut 2022 dhe të Ministres së Infrastrukturës dhe Energjisë që prej janarit 2019, dhe ka qenë gjithashtu drejtuesja politike e qarkut Fier, ku në zgjedhjet e 11 majit fitoi 12 mandate.
Marrë nga Boldnews.al
