Drejtori aktual i Policisë së Korçës, Erion Ahmeti, është shndërruar në një “xhandar” në qytetin juglindor, teksa skandalet e njëpasnjëshme në Doganën e Kapshticës as nuk ia kanë prishur terezinë.
Me këto lidhje, por edhe me suportin e bashkëshortes gjyqtare, Alma Ahmeti, “xhandari” i Korçës është bërë i paprekshëm, duke i shërbyer klanit dhe atyre që e emëruan si drejtor në juglindje.
Ai ka qenë polic dhe oficer policie në Korçë, ku ka qëndruar disa vite. Më pas është transferuar në Drejtorinë e Përgjithshme të Policisë së Shtetit, sërish në seksionin e Policisë Rrugore. Është transferuar në Berat dhe më pas në Tiranë.
Për një kohë të gjatë, ai ka shefi i rrugores në Tiranë, ku më së shumti njihet për “miqësinë” me ndërtuesit, duke lejuar betoniere të lëviznin lirisht në çdo orë të ditës në kryeqytet. Megjithëse kufizimet e lëvizjes ishin miratuar, ai i shpërfilli çdo vendim.
Suporti i tij në Policinë e Shtetit ishte ish-drejtori Ardi Veliu, por largimi i tij solli edhe shkarkimin e vetë Ahmetit. Në tetor të vitit 2021 ai u largua nga drejtimi i Komisariatit të Policisë Rrugore në Tiranë, madje disa kohë para se të largohej pati edhe përplasje me aktorë dhe personazhe publike, të cilët e akuzuan për “përndjekje”.
Emërimi i Ervin Hoxhës në krye të Ministrisë së Brendshme solli edhe “provime” për drejtor policie dhe shefa komisariatesh. Procesi pati shumë diskutime, pasi me këtë vendim Hoxha solli në krye të Policisë së Shtetit të preferuarit. Fillimisht, hapi konkurs për Drejtor të Përgjithshëm të Policisë së Shtetit, ku në fund “fitoi” Ilir Proda.
Më pas hapi konkurs për Drejtor të Drejtorive Rajonale, ku u shpallën 12 fitues. Normalisht, “klani i Fushëbardhës” hyri në lojë, pasi një ish-drejtor Ardi Veliu dhe drejtori i emëruar Ilir Proda u futën “mik” për Erion Ahmetin. Të tre janë me origjinë nga Fushëbardha, teksa më pas dikush ka jetuar në Delvinë dhe të tjerë në Sarandë.
Çuditërisht, Erioni i betoniereve para konkursit mori gradën “drejtues”, çka e lejoi të konkurronte për “Drejtor Policie”. Pa asnjë përvojë në luftën kundër krimit, ai arriti të dalë fitues, përpara emrave që kanë vite në gradë të lartë dhe që kanë dhënë kontribut në Policinë e Shtetit. Ahmeti mori më shumë pikë se sa Tonin Vocaj, Skënder Hitaj, Altin Qato e të tjerë, funksionarë me përvojë në Policinë e Shtetit.
Natyrisht kjo renditje ishte një tjetër pikëpyetje mbi procesin e rekrutimit të drejtorëve. Ende sot është e paqartë se cilat ishin cilësitë, kriteret apo vjetërsia që e kanë renditur me pikë më shumë se zyrtarë të tjerë policorë. Por, begraundi i betoniereve, lidhja me gjyqësorin apo edhe “klani” e katapultuan në një nga Drejtoritë më elitare të Policisë së Shtetit, në Korçë.
Ai u rikthye në juglindje, jo si oficer qarkullimi por si drejtor, duke vendosur edhe “ligje” të brendshme, ku kërkon që çdokush t’i bindet.
Megjithatë, zullumet kanë filluar ti dalin në shesh, teksa Dogana e Kapshticës është bërë si han pa porta. Pak kohë më parë, në redaksinë e VoxNews mbërritën informacione se punonjës të Policisë së Shtetit “lejojnë” një mori parregullsish.
Kjo u vërtetua edhe kur Policia e Korçës njoftoi se drejtori i Hetimit Doganor në Drejtorinë e Përgjithshme të Doganave, dy specialistë në këtë drejtori dhe 3 doganierë të Kapshticës janë proceduar penalisht për shpërdorim detyre. Disa doganierë, në bashkëpunim me policët, shpërdoruan detyrën duke falsifikuar dokumentet e regjistrimit të një ngarkese me mallra ushqimore.
Megjithatë, duket se policia ka prerë vetëm disa degë të korrupsionit duke lënë pa cënuar trungun dhe rrënjët.
Marrë nga VoxNews.al
