Lidhja e Sindikatave të Maqedonisë (LSM) ka shpallur mobilizim të përgjithshëm dhe ka paralajmëruar protesta masive në kryeqytet. Të mërkurën e ardhshme, punëtorë nga sektorë të ndryshëm do të dalin në rrugët e Shkupit me kërkesën kryesore për rritjen e pagës minimale në 600 euro.
Sipas kryetarit të LSM-së, Sllobodan Trendafillov, situata ekonomike e punëtorëve në vend është jashtëzakonisht e vështirë.
Ai theksoi se pragu i varfërisë aktualisht është 31.200 denarë, ndërsa mbi 33 për qind e të punësuarve, ose rreth 180 mijë persona, marrin paga më të ulëta se ky prag.
Trendafillov theksoi se punëtorët ndihen të zhgënjyer dhe të mashtruar nga premtimet e parealizuara të qeverive dhe menaxherëve ndër vite, duke shtuar se kostoja e jetesës është rritur ndjeshëm, ndërsa pagat kanë mbetur pothuajse të pandryshuara.
Protesta do të mbahet më 28 janar, në ora 17:00, ndërsa marshimi i protestës do të nisë nga Shtëpia e Punëtorëve, godina e LSM-së.
Marshi do të vazhdojë drejt Kuvendit të Maqedonisë së Veriut, më pas do të ndalet para Odës Ekonomike, ndërsa do të përfundojë para Qeverisë së Maqedonisë së Veriut.
Kreu i LSM-së paralajmëroi se nëse institucionet nuk reagojnë ndaj kërkesave të punëtorëve, sindikata do të nisë mbledhjen e 10.000 nënshkrimeve për të kërkuar ligjërisht uljen e pagave të zyrtarëve për 78 për qind, si dhe rritjen e pagave të punëtorëve.
Çfarë pritet më tej?
Nga LSM-ja bëjnë të ditur se kjo protestë është vetëm hapi i parë. Në rast se kërkesat e tyre nuk plotësohen, sindikata paralajmëron:
bllokada të vazhdueshme të qytetit,
grevë të përgjithshme në sektorin publik,
dhe nisma ligjore për ndryshimin e pagave të funksionarëv
Marrë nga Alsat.mk
