Bordi i Drejtorëve Ekzekutivë të Bankës Botërore ka aprovuar një financim shtesë prej 80 milionë dollarë për të mbështetur përpjekjet e Shqipërisë në modernizimin dhe transformimin digjital të sektorit publik. Ky investim ka për qëllim përmirësimin e aksesit në shërbimet kryesore për qytetarët, me një fokus të veçantë në grupet më të cenueshme.
Ky financim shtesë është rezultat i avancimeve të bëra në projektin kryesor “Përmirësimi i Aksesit të Barabartë në Shërbimet Publike me Standarde të Larta përmes GovTech”, i cili ka një vlerë prej 65 milionë dollarë dhe ka si qëllim të përmirësojë aksesin dhe cilësinë e shërbimeve publike për të gjithë qytetarët.
Financimi shtesë i sapo miratuar sipas BB do të zgjerojë aktivitetin e programit në tri fusha të rëndësishme:
-Rimodelimi dhe digjitalizimi i shërbimeve të qeverisjes vendore: Kjo do të sigurojë efikasitet në aksesin ndaj një game të gjerë shërbimesh administrative bashkiake, duke sjellë përfitime për qytetarët dhe bizneset.
-Zhvillimi i një platforme të re digjitale për prokurimin publik: Duke integruar inovacionin e bazuar në inteligjencën artificiale, kjo platformë do të rrisë transparencën, efikasitetin dhe llogaridhënien në proceset e prokurimit publik, duke sjellë kursim dhe efikasitet në kontraktimet që bëjnë institucionet qeveritare.
-Zbatimi i një sistemi të ri për menaxhimin e financave publike: Përmes hartimit dhe zbatimit të një sistemi të ri digjital për menaxhimin e financave publike, programi do të ndihmojë qeverinë qendrore dhe vendore të menaxhojnë më shpejt dhe më saktë buxhetin për investime publike për popullsinë lokale.
Marrë nga Newsbomb.al
