Siguria teknike e automjeteve vijon të mbetet një problem serioz në Shqipëri. Të dhënat e Drejtorisë së Shërbimit të Transportit Rrugor tregojnë se gjatë vitit 2025, 23.5 për qind e mjeteve që iu nënshtruan kontrollit teknik nuk arritën ta kalojnë testin që në herën e parë.
Praktikisht, një në katër makina rezulton e papërshtatshme për qarkullim pa ndërhyrje riparuese.
Sipas statistikave, nga gjithsej 81 mijë e 65 mjete të refuzuara gjatë kontrollit teknik, problemet kryesore lidhen me shkarkimin e gazrave, që përbën 37.6 për qind të rasteve. Pasojnë defektet vizuale me 34.4 për qind, problemet me sistemin e frenimit me 15.2 për qind, si dhe drejtimi dhe pezullimet me 12.8 për qind.
Pas kryerjes së rregullimeve të nevojshme, shumica e mjeteve kanë arritur të rikolaudohen.
Gjatë vitit, 73 mijë e 230 automjete janë ritestuar me sukses, ndërsa 7 mijë e 502 mjete vijojnë të jenë ende në pritje për riparim.
Ndërkohë, 333 mjete janë refuzuar përfundimisht për shkak të manipulimit të odometrit.
Të dhënat nxjerrin në pah gjendjen reale të parkut automjetesh në vend dhe nivelin e lartë të problemeve teknike që rrezikojnë drejtpërdrejt sigurinë rrugore.
Kontrolli teknik mbetet një filtër i domosdoshëm për të garantuar mjete më të sigurta dhe për të ulur rrezikun e aksidenteve në rrugët e vendit.
Marrë nga Skyweb.al
