Një rast i Hantavirusit u identifikua në Shqipëri rreth katër dekada më parë, duke treguar se prania e këtij virusi në vend nuk është një fenomen i ri, por një realitet i dokumentuar që nga vitet 1980.
Duke iu referuar një botimi në revistën prestigjioze The Lancet, rasti i parë u regjistrua në veri të Shqipërisë dhe është bërë pjesë e literaturës shkencore ndërkombëtare. Studimi, i botuar më 21 nëntor 1987, titullohet “Ethe hemorragjike me sindromë renale në një rast në veri të Shqipërisë” dhe përshkruan një rast të etheve hemorragjike të shoqëruara me sindromën renale.
Ky dokumentacion shkencor përbën një nga referencat më të hershme që lidh Shqipërinë me këtë virus, i cili njihet për ndikimin e tij serioz në shëndetin e njeriut. Sipas një reagimi të fundit në rrjetet sociale nga Silva Bino, Drejtoreshë e Epidemiologjisë dhe Sëmundjeve Infektive në IHP, autorët e këtij raporti janë studiuesit E. Eltari, M. Nuti, I. Hasko dhe A. Gina.
Edhe pse raste të tilla janë të rralla, ekspertët theksojnë rëndësinë e monitorimit dhe ndërgjegjësimit, veçanërisht në zonat rurale ose ato ku kontakti me brejtësit është më i shpeshtë. Ky ringjallje e një rasti të vjetër shërben si një kujtesë për rëndësinë e mbikëqyrjes epidemiologjike dhe reagimit në kohë ndaj sëmundjeve infektive.
Marrë nga VoxNews.al
