Koorporata e Investimeve Shqiptare anuloi sërish procedurën e projektit LIFT Tower duke nënvizuar se nuk kishte pasur asnjë aplikant që të shprehte interes. Kjo është hera e 5-të që Korporata nxjerr për shprehje interesi këtë projekt dhe në të gjitha rastet interesi ka munguar.
Thirrja e fundit u shpall në 30 janar me datë finalizimi në shkurt që më pas u shty në 19 mars por që sërish ka rezultuar pa sukses. Duket se projekti nuk ka arritur të marrë interesin e privatëve as pas uljes së sipërfaqes që duhej t’i ofrohej Korporatës nga subjekti që nga 45 për qind në procedurat e mëparshme u bë 40 për qind.
Lift Tower bën pjesë tek projektet e para që qeveria shpalli si një nismë për të zhvilluar pronën shtetërore në bashkëpunim me sipërmarrjen private.
Projekti i Lift Tower
Në dokumentet e saj Korporata sqaronte se ky është një ndër nënprojektet e para që lidhet dhe bazohet në një model biznesi ku janë në bashkëpunim edhe institucionet publike si: Agjencia Shtetërore e Kadastrës (ASHK), Agjencia Shtetërore për Shpronësimin (ASHSH) dhe Agjencia e Trajtimit të Pronave (ATP).
Projekti synon të zhvillojë pronën në rrugën “Muhamet Gjollesha” (tek fakulteti i Inxhinierisë së Ndërtimit), e të përmirësojë cilësinë e godinave dhe zyrave të të gjitha institucioneve publike të sipërpërmendura.
“Nëpërmjet këtij nënprojekti, sipas një analize paraprake, rezulton se institucionet publike përfitojnë sipërfaqe të konsiderueshme të shtuar ndërtimore të zhvilluar. Pas përfundimit të projektit, ato do të zhvendosen në pronën e zhvilluar, duke nxitur sinergjinë operacionale dhe duke optimizuar shfrytëzimin hapësinor.
Bazuar në këto nevoja, me vendimin VKM 328/2024, Këshilli i Ministrave me aktin e transferimit të disa pronave në pronësi të Korporatës dhe disa pronave të tjera me të drejta zhvillimi, vendosi si kusht për transferimin e pronës plotësimin e nevojave të institucioneve publike sipas termave të marrëveshjeve të bashkëpunimi, terma të cilat ishin baza e hapjes së konkursit të projektimit të projekt-idesë së projektimit pjesë e kësaj procedure konkurruese lidhur me ndërtimin e godinës së Kadastrës Shqiptare, në zonën e Zogut të Zi (në afërsi të shkollës “Harry T.Fultz”) në një truall rreth 7,500 m2, të vënë në dispozicion nga ASHK (ku ndodhet aktualisht Drejtoria Vendore e ASHK).
Për të mundësuar zhvillimin e godinës së Kadastrës Shqiptare (kushti publik i transferimit të pronës) dhe në mënyrë që institucionet publike të përfitojnë pa kosto 34,000 m2 ndërtim me parametra modernë dhe cilësorë, vihet në dispozicion nga ATP për zhvillim me sipërmarrjen të godinës LIFT Toëer, prona e saj tek rruga “Muhamet Gjollesha”, pranë fakultetit të Inxhinierisë së Ndërtimit, rreth 2,357.55 m2.
Kjo pronë ka vlerë të lartë ekonomike për sipërmarrjen dhe si rrjedhim është me interes për t’u zhvilluar” nënvizon KISH.
Si ka dështuar shumica e projekteve të zhvillimit të pronave të shtetit me privatin
Qeveria nisi në vitin 2024 një projekt që synonte të zhvillonte pronat shtetërorë me sektorin privat. Ky i fundit do të financonte projektet dhe Korporata për llogari të shtetit do të përfitonte zyra për institucione të ndryshme dhe prona të tjera që do të gjeneronin të ardhura.
Deri më sot pak projekte ja kanë dalë të kenë një fitues të finalizuar, shumica prej tyre nuk kanë parë interes nga ana e privatit. Të tillë përveç LIFT Tower ishin projektet e tre stadiumeve në qytete të ndryshme të vendit apo siç ishin procedurat për Bibliotekën Kombëtare që mbetet ende pa një projekt final.
Marrë nga Monitor
