Asociacioni i Gazetarëve të Shqipërisë ka marrë raportime për largime masive nga puna të gazetarëve, moderatorëve dhe drejtuesve të emisioneve në media, në përfundim të këtij sezoni televiziv.
Këto zhvillime, të shoqëruara me mungesë transparence dhe pa komunikim publik për arsyet konkrete, janë shqetësuese dhe rrezikojnë të cenojnë jo vetëm sigurinë e punës, por edhe standardet profesionale në fushën e medias, thotë AGSH.
AGSH po minitoron situatën në media konkrete dhe do të shprehim vlerësimin tonë sapo të kontakojmë të gjitha palët e përfshira.
Asociacioni rikujton të gjitha institucionet mediatike se respektimi i Kodit të Punës, kontratave, procedurave të ligjshme të shkarkimit dhe dinjitetit të profesionistëve të medias, është jo vetëm detyrim ligjor, por edhe moral.
Largimet pa sqarim krijojnë klimë pasigurie, demoralizojnë komunitetin gazetaresk dhe cenojnë lirinë redaksionale. AGSH thekson se po minitoron situatën në media konkrete dhe do të shprehim vlerësimin tonë sapo të kontakojmë të gjitha palët e përfshira.
“U bëjmë thirrje të gjitha mediave që të jenë të kujdesshme në trajtimin e burimeve njerëzore, duke garantuar procese të drejta, transparente dhe të dokumentuara për çdo vendim që lidhet me marrëdhëniet e punës.
Ne do të ndjekim nga afër situatën dhe jemi të gatshëm të ofrojmë mbështetje për çdo gazetar/e që ndjen se i janë cenuar të drejtat ligjore apo profesionale”, thotë deklarata e Asociacionit të Gazetarëve të Shqipërisë.
Liria e medias dhe cilësia e informacionit nuk mund të ekzistojnë pa gazetarë të mbrojtur, të respektuar dhe të trajtuar me dinjitet.
Marrë nga Newsbomb.al
