Shpërndarja gjeografike e rrjetit rrugor në vend tregon se më shumë kilometra kanë qarqet e Jugut dhe Veriut, teksa Durrësi dhe Tirana në të cilat është përqendruar gjysma e popullsisë dhe ekonomisë së vendit kanë më pak.
Sipas të dhënave të INSTAT në vitin 2025 në inventarin e Autoritetit Rrugor Shqiptar në të gjithë vendin ishin 3667 kilometra rrugë, ku Shkodra dhe Vlora ndajnë peshën kryesore me nga 13% të totalit secila. Këto qarqe kryesojnë pasi mbulojnë sipërfaqe të mëdha që kombinojnë zonat bregdetare, fushore dhe ato malore, çka kërkon një rrjet më të shtrirë për të lidhur pikat e largëta.
Ky përqendrim i lartë i rrjetit rrugor ndiqet nga qarqet e Elbasanit dhe Korçës, të cilat ruajnë një prezencë domethënëse në infrastrukturën kombëtare me përkatësisht 10.6% dhe 10.4% të totalit të rrjetit. Po ashtu, Korça dhe Elbasani, duke qenë zona me shtrirje të gjerë kanë më shumë kilometra.
Në zonat malore dhe ato veriore, Kukësi zë një vend të rëndësishëm me gati 9% të rrjetit për shkak të terrenit të thyer malor dhe lidhjeve me Kosovën, ndërsa Fieri përfaqëson nyjën kryesore të ultësirës jugperëndimore me 8.2% të totalit të kilometrave në rang kombëtar.
Lezha dhe Gjirokastra ndajnë shifra të barabarta me 7% secila në të rrjetit kombëtar, raporton Monitor.al.
Kryeqyteti, pavarësisht densitetit të lartë të popullsisë, zë vetëm 6.7% të shtrirjes totale të rrjetit rrugor. Ndërkohë, në fundin e klasifikimit gjenden Berati dhe Durrësi, ku ky i fundit rezulton me përqindjen më të ulët në nivel kombëtar, duke zënë vetëm 4% të rrjetit total, shifër kjo që bie në sy duke pasur parasysh rëndësinë e tij si nyjë portuale dhe turistike. Megjithëse këto qytete kanë trafikun më të lartë, ato kanë territor më të vogël në sipërfaqe krahasuar me qarqet e veriut apo jugut.
Mirëpo varfëria e rrugëve në zonën Tiranë-Durrës lidhet edhe me mungesën e investimeve publike në këto qarqe përgjatë dy dekadave të fundit. Investimet e reja në infrastrukturën rrugore kanë favorizuar periferitë e vendit, duke lënë qendrën me mungesa të thella infrastrukturore.
Aktualisht autostrada që lidh dy qytetet më të mëdha të vendit Tiranën dhe Durrësin dhe dy rajonet kryesore, Jugun me Veriun është e dëmtuar rëndë nga mbikalimi i Rinasit deri në Durrës, ndërkohë që investimet në rrugë janë përqendruar në qarkun e Vlorës në 12 vitet e fundit.
Marrë nga Newsbomb.al
