Prej vitit 1998 Britania e Madhe është kthyer në destinacionin më të preferuar për emigrimin e shqiptarëve. Sot, jozyrtarisht, besohet se mbi 200 mijë shqiptarë jetojnë në Mbretërinë e Bashkuar, shumica nga Shqipëria, por edhe nga Kosova dhe Maqedonia e Veriut.
Megjithatë, shpallja e Shqipërisë si “vend i sigurt” nga qeveria britanike në vitin 2023 ka sjellë pasoja të forta dekurajuese për azilkërkuesit
Shifrat e publikuara nga Home Office tregojnë se gjatë vitit 2024 aplikuan vetëm 3.698 shqiptarë për azil. Ky është një ulje drastike krahasuar me vitin 2022, kur numri arriti rekordin me 17.340 aplikime, kryesisht pas mbërritjes me gomone.
Nga këto aplikime, vetëm 3% kanë qenë të suksesshme. Konkretisht, 2.112 kërkesa u refuzuan, 100 u miratuan, ndërsa 3.478 janë ende në pritje të shqyrtimit.
Ndryshe nga azilkërkimi, aplikimet për viza turistike kanë pësuar rritje. Gjatë vitit 2024, shqiptarët bënë 28.554 aplikime për vizë. Prej tyre, 20.192 u miratuan dhe 9.271 u refuzuan, duke shënuar një përqindje suksesi prej 68%.
Një tjetër të dhënë e rëndësishme vjen nga burgjet britanike, ku shqiptarët mbeten grupi më i madh i të huajve të dënuar.
Aktualisht, 1.193 shqiptarë vuajnë dënime në Angli dhe Uells, kryesisht për vepra të rënda penale. Në vitin 2015 ata renditeshin në vend të gjashtë, por prej vitit 2019 kanë kaluar në vendin e parë, përpara polakëve, rumunëve dhe lituanezëve.
Ndër të dënuarit për vrasje, më i njohuri është Koci Selamaj nga Elbasani, i cili po vuan 36 vite burg, dënimi më i gjatë i dhënë ndonjëherë për një shqiptar në Angli. Po ashtu, Eugert Merizaj nga Mallakastra po vuan një dënim prej 32 vitesh, ndërsa anëtari i grupit Hellbanianz, Sabajet Shuti, u dënua vetëm pak javë më parë me 27 vite burg për vrasje.
Marrë nga Top Channel
