Situata ka dalë jashtë kontrollit mesditën e sotme në Vlorë, ku tregtarët protestues janë futur me forcë brenda ambienteve të Bashkisë, në shenjë revolte ndaj vendimeve që po i nxjerrin në rrugë dhe po i lënë pa punë.
Protesta, e cila nisi përpara godinës së bashkisë, u përshkallëzua pas mungesës së reagimit nga drejtuesit vendorë. Të revoltuar dhe të dëshpëruar, tregtarët hynë brenda bashkisë, duke kërkuar takim urgjent dhe zgjidhje konkrete për fatin e tyre.
“Po na nxjerrin në rrugë, jemi hallexhinj, na lanë pa punë”, dëgjohen të thonë tregtarët, të cilët akuzojnë Bashkinë e Vlorës për mungesë dialogu.
Sipas tyre, edhe takimi i zhvilluar një ditë më parë me kryetaren e bashkisë, Bruna Mersini, nuk solli asnjë zgjidhje konkrete, duke i detyruar kështu të reagojnë me protesta dhe veprime më të forta.
Tregtarët paralajmërojnë se nuk do të tërhiqen dhe se aksionet e tyre do të vijojnë nëse institucionet vendore nuk reflektojnë dhe nuk ofrojnë zgjidhje të menjëhershme.
Marrë nga Syri.net
