Botohet në Fletoren Zyrtare, Vendimi i Këshillit të Ministrave për përcaktimin e numrit të punonjësve me kontratë të përkohshme për vitin 2026 në njësitë e qeverisjes qendrore, duke saktësuar njëkohësisht rregullat e pagesës, kategoritë e pagave dhe burimet e financimit për këto pozicione.
Në mbështetje të përballimit të emergjencave të paparashikuara shëndetësore dhe zbatimit të programeve të depistimit, 50 punonjës shëndetësorë dhe të tjerë mbështetës do të alokohen me urdhër të ministrit përgjegjës për shëndetësinë pranë Operatorit të Shërbimeve të Kujdesit Shëndetësor dhe Qendrës Kombëtare të Urgjencës Mjekësore. Pagesa për pozicionin e punës në të cilin caktohen punonjësit bëhet përkatësisht nga Operatori dhe Qendra Kombëtare e Urgjencës Mjekësore.
Mbulimi i efekteve financiare për punonjësit me kontratë bëhet nga shpenzimet korrente, të miratuara në buxhetin përkatës të njësive të qeverisjes qendrore. Për punonjësit me kontratë të Shtëpisë së Pushimit Durrës (MB), Shtëpisë së Pushimit të SHISH-it dhe Shërbimit Gjeologjik Shqiptar, efektet financiare përballohen nga të ardhurat e vetë institucionit.
Në total për vitin 2026 janë 2179 punonjës me kontratë të shpërndarë në gjithë administratën publike, ku numri më i lartë alokohet në ministritë e linjës, nga pozicionet e specialistëve, redaktorëve, punonjësve të arkivit, punonjësve të mirëmbajtjes, etj.
Vendimi përcakton se mbulimi i efekteve financiare për punonjësit me kontratë do të bëhet nga shpenzimet korrente të miratuara në buxhetet përkatëse të njësive të qeverisjes qendrore.
Marrë nga Ekofin.al
