Protestuesit u mblodhën mbrëmë para kryeministrisë në ditën e 28-të të revoltës studentore kundër qeverisë Rama. Tubimi ishte në vazhdën e protestave të përditshme që prej 31 majit, të cilat janë intensifikuar javët e fundit me pjesëmarrjen e studentëve dhe të rinjve.
Protestuesit u pozicionuan përpara godinës së Kryeministrisë, ndërsa efektivët e Policisë qëndrojnë në shkallët e godinës qeveritare.
Gjatë tubimit janë regjistruar edhe debate mes qytetarëve dhe policisë, pasi efektivët vendosën gjoba për personat që ishin pjesëmarrës në protestë.Disa prej qytetarëve kanë thënë se policia u ka kërkuar dokumentet e identifikimit, duke u thënë se ishin fotografuar gjatë tubimeve.
Po ashtu, një prej tyre ka treguar se ishte ndaluar teksa po kalonte në trotuar dhe se efektivi kishte nisur procedurën për gjobitjen e tij, me argumentin se ishte identifikuar në pamjet e protestës.
Protestat e ditëve të fundit janë shoqëruar edhe me përplasje mes demonstruesve dhe policisë. Episodi i fundit u regjistrua gjatë protestës kombëtare të së shtunës, në rrugën e Durrësit, pranë Ministrisë së Arsimit dhe përballë Kryeministrisë.
Ndërkohë, qytetarët që kanë marrë pjesë në tubime që prej ditëve të para shprehen se do të vijojnë të qëndrojnë në shesh deri në largimin e qeverisë.Ata e konsiderojnë protestën një lëvizje qytetare dhe shoqërore, që synon jo vetëm ndryshimin politik, por edhe ndërgjegjësimin dhe përfshirjen më të madhe të qytetarëve.
Pjesëmarrësit kanë kundërshtuar gjithashtu thirrjet e kryeministrit Edi Rama për dialog, duke e cilësuar këtë ofertë si një përpjekje për të ndërprerë protestën. Sipas tyre, dialogu nuk mund të zhvillohet pa u trajtuar më parë incidentet dhe dhuna gjatë përplasjeve me policinë.
Ata kanë theksuar se nuk do të largohen nga sheshi dhe u kanë bërë thirrje qytetarëve të tjerë t’u bashkohen protestave.
Marrë nga Dosja.al