Real Sociedadi arriti një fitore epike 2–1 ndaj Barcelonës, në një ndeshje të mbushur me polemika, raste të humbura dhe momente vendimtare që e kthyen sfidën në dramatike deri në sekondat e fundit.
Që në fillim, Barcelona krijoi rrezik serioz, por Alex Remiro u shfaq vendimtar me pritje vendimtare ndaj Pedrit dhe më pas ndaj Dani Olmos. Katalanasit menduan se kaluan në avantazh në disa raste, por VAR-i anuloi tre gola për pozicion jashtë loje ose faull në ndërtim, duke ndryshuar rrjedhën e pjesës së parë.
Momenti kyç erdhi në minutën e 32-të, kur Mikel Oyarzabal përfitoi nga një asist i Gonçalo Guedes dhe shënoi golin e avantazhit për Real Sociedadin, 1–0. Pak para pushimit, Barcelona fitoi një penallti, por pas rishikimit në VAR, vendimi u anulua, duke shkaktuar protesta të forta.
Në pjesën e dytë, Barcelona shtoi presionin: Dani Olmo dhe Lewandowski goditën shtyllën, ndërsa Remiro vazhdoi të ishte mur i pakalueshëm. Barazimi erdhi në minutën e 70-të, kur Marcus Rashford, i futur nga stoli, realizoi me kokë pas asistit të Lamine Yamal.
Gëzimi i Barcelonës zgjati pak. Vetëm një minutë më vonë, Gonçalo Guedes shfrytëzoi një moment hutimi në mbrojtje dhe shënoi golin e fitores, 2–1, për vendasit. Në minutat e fundit, Real Sociedadi mbeti me një lojtar më pak pas kartonit të kuq për Carlos Soler, ndërsa Barcelona iu afrua barazimit në sekondat e fundit: në minutën 90+3’, një goditje nga këndi e Rashford u përplas në shtyllë.
Fishkëllima finale vulosi një fitore të madhe për Real Sociedadin, të ndërtuar mbi efikasitetin, rezistencën dhe një Remiro vendimtar.
Marrë nga Syri.net
