Shqipëria U-21, triumfoi ndaj moshatarëve të Zvicrës me rezultatin 2-1 në ndeshjen vlefshme për kualifikueset e Euro 2025.
Triumf me përmbysje nga kuqezinjtë, falë një super Adrian Pajaziti që realizoi dopietë dhe portierit Klidman Lilo, që priti një penallti në minutat e fundit.
Helvetët vendas, shënuan të parët në minutën e 16-të me Surdez, por avantazhi zgjati pak, pasi dy minuta më vonë, Pajaziti barazoi shifrat.
Pjesa e parë u mbyll në barazim 1-1, ndërsa fraksioni i dytë i lojës, ishte akoma më spektakolar.
Një supergol i Pajazitit në minutën e 69-të, i dha avantazhin Shqipërisë. Sulmuesi lëshoi një predhë nga jashtë zone, për ta ndalur topin në fundin e rrjetës.
Në minutën e 85-të, Lilo u kthye në heroin e kombëtares kuqezi, me portierin që priti penalltinë e gjuajtur nga Nikolas Muci.
Shqipëria e ruajti avantazhin deri në fund, për të marrë fitoren, e cila e ngjit në kuotën e 13 pikëve, po aq sa Finlanda e vendit të tretë dhe 1 pikë më pak se Zvicra e vendit të dytë.
Vlen të përmendet se Shqipëria ka edhe një ndeshje për të luajtur në grupin E, ndërsa Zvicra edhe tre të tjera.
