Everton ka huazuar sulmuesin e Chelsea, Armando Broja. Marrëveshja është arritur për sezonin 2024-2025 si hap i parë. Në të është përfshirë opsioni për ta bërë lëvizjen e përhershme verën e ardhshme për një tarifë prej 30 milionë stërlinash.
Evertoni kishte kohë deri në orën 1 të mëngjesit për ta përfunduar transferimin, pasi kishte dorëzuar një fletë marrëveshjeje përpara afatit të fundit të orës 23:00.
Ipswich Town ishte tërhequr më herët nga një marrëveshje e mundshme, pasi klubi debutues në Premier League refuzoi të pranonte kushtet e Chelsea, duke pasur parasysh sasinë e kohës për të cilën Broja ka të ngjarë të jetë jashtë fushës.
Sulmuesi shqiptar pritet të mungojë deri në mes të tetorit për shkak të një dëmtimi në këmbë. Marrëveshja kuptohet të jetë e favorshme financiarisht për Everton, derisa Broja të kthehet në gjendje të plotë.
The Athletic” raportoi sot se Ipswich kishte rishikuar bisedimet me Chelsea, por dy ofertat e reja u refuzuan. Broja ka pasur më parë tri huazime larg Chelsea, konkretisht te Vitesse, Southampton dhe Fulham. Kontrata e tij me Chelsea është deri në vitin 2028.
Ai pësoi një dëmtim të ligamentit të kryqëzuar anterior (ACL) në dhjetor 2022, gjë që e mbajti jashtë fushave deri në shtator të vitit pasardhës. Broja më pas iu bashkua Fulhamit në merkaton e janarit, por koha e tij e lojës në “Craven Cottage” ishte e kufizuar, duke bërë vetëm 8 paraqitje dhe dështuar të shënonte.
