SHBA: Nuk merremi me njerëz të përfshirë në korrupsion madhor

Pavarësisht se me fitoren e Donald Trump, në kampin e opozitës u rritën shpresat për heqjen e shpalljes “non grata” nga SHBA ndaj Berishës, duket se gjërat janë ndryshe.

Ambasada amerikane në Tiranë, ka shpërndarë një deklaratë në rrjete sociale ku shprehet qartë se nuk bashkëpunojnë me individë të përcaktuar për përfshirje në korrupsion madhor.

“Një opozitë e shëndetshme është pjesë me rëndësi kritike e një demokracie të gjallë.

I vlerësoj mundësitë që kam pasur muajt e fundit për t’u takuar me përfaqësues të ndryshëm të opozitës për të dëgjuar një larmi këndvështrimesh mbi sfidat me të cilat përballet populli shqiptar, shqetësimet për mjedisin e ardhshëm zgjedhor dhe sesi Shqipëria mund të ndërtojë një të ardhme më të mirë.

Nxis të gjitha palët të angazhohen në mënyrë konstruktive në një proces politik që është i barabartë për të gjithë. Ne i qëndrojmë pozicionit tonë të kahershëm se nuk angazhohemi me individë të përcaktuar për përfshirje në korrupsion madhor.”  E ngarkuara me punë Nancy VanHorn.