Presidentja e Komisionit Evropian, Ursula von der Leyen, mund të përballet me një moment kritik në 24 orët e ardhshme, pasi Gjykata e Bashkimit Evropian pritet të vendosë të mërkurën nëse mesazhet e shkëmbyera mes saj dhe CEO-së së Pfizer, Albert Bourla, lidhur me një marrëveshje miliarda-euroshe për vaksinat kundër COVID-19, duhet të bëhen publike.
Në thelb të çështjes është pyetja nëse mesazhet SMS duhen konsideruar dokumente zyrtare që i nënshtrohen rregullave të transparencës së BE-së. Refuzimi i Komisionit për të bërë publike këto mesazhe është kontestuar nga “The New York Times”, e cila ngriti padi në vitin 2022 pas zbulimit të ekzistencës së tyre nga një intervistë me Bourla në prill 2021. Ai e kishte përshkruar komunikimin me von der Leyen si një “rritje të besimit të thellë” që ndihmoi në përmbylljen e marrëveshjes.
Marrëveshja në fjalë, e përfunduar në maj 2021, ishte më e madhja e arritur ndonjëherë nga BE për furnizimin me vaksina, duke përfshirë 900 milionë doza të garantuara dhe mundësinë për të porositur edhe 900 milionë të tjera për vitet 2022 dhe 2023.
Një vendim negativ për Komisionin do të rihapte debatin mbi mungesën e transparencës institucionale, veçanërisht në një kohë kur von der Leyen ka theksuar rëndësinë e integritetit dhe llogaridhënies publike në funksionin e saj. Më herët, gjyqtarët e shkallës së parë në të njëjtën gjykatë kishin kritikuar Komisionin për redaktimin e gjerë të kontratave të vaksinave përpara publikimit, veprim që ishte justifikuar me mbrojtjen e privatësisë dhe interesave tregtare.
Marrë nga Vizionplus.tv
