Kryetari i Partisë Demokratike, Sali Berisha, paraqiti emrin e Florjan Binajt si kandidaturë të vlefshme përballë socialistes Ogerta Manastirliu në zgjedhjet e pjesshme lokale që do të zhvillohen në Tiranë më 9 nëntor.
Në një dalje për mediat nga selia blu, lideri i opozitës deklaroi se grupi i mandatuar nga PD do tu paraqesë aleatëve sugjerimin për të mbështetur atë që e cilësoi si luftëtarin e paepur të kauzave të qytetarëve shqiptarë, Florjan Binaj.
Gjatë prezantimit të Florjan Binajt si kandidat të mbështetur nga PD, kryedemokrati Berisha theksoi se Binaj është në linjën e parë të luftës kundër korrupsionit.
I pyetur lidhur me pavarësinë e aktorit dhe kandidatit që do t’u propozohet aleatëve, Berisha u shpreh se çdo gazetar që merret me investigim dhe u thotë qytetarëve të vërtetat, meriton respekt të padiskutueshëm.
Ai përmendi edhe rastin e emisionit Piranjat dhe vështirësitë që pësoi pas largimit nga televizioni ku transmetohej më parë.
Për kreun e PD-së, vendimmarrja për kandidaturat do të jetë e shpejtë, pas konsultimeve me aleatët.
Ndër të tjera, kryetari i Partisë Demokratike Sali Berisha dha garancinë e plotë të forcës politike që drejton, duke theksuar se PD do të jetë një mbështetje e plotë dhe totale për kandidatin e propozuar Florjan Binaj.
Marrë nga Dosja.al
