Autoriteti Kombëtar i Ushqimit në Shkodër ka bllokuar sërish një sasi misri blegtoral të ardhur nga Serbia, kësaj here 75 tonë. Ky është rasti i dytë brenda pak ditësh, pas bllokimit të 25 tonëve misër nga i njëjti subjekt eksportues, duke e çuar në 100 tonë sasinë totale të ndaluar.
Sipas drejtorit të AKU Shkodër, Ramir Haderi, misri është bllokuar në doganën e Hanit të Hotit, me qëllim kryerjen e analizave laboratorike për të përcaktuar nëse ka prani të lartë të aflatoksinës B1, një substancë toksike dhe kancerogjene që mund të tejkalojë normat e lejuara në Shqipëri.
Gjithashtu, AKU Shkodër ka bllokuar një fermë në fshatin Trush, pasi nga verifikimet në sistemin e grumbullimit ka rezultuar se ajo furnizohej me misër blegtoral nga i njëjti subjekt i ndaluar në doganë.
Burime nga dogana e Hanit të Hotit bëjnë me dije se deri më tani janë bllokuar rreth 200 tonë misër në total, për të cilat do të kryhen analizat përkatëse. Në rast se konfirmohet prania e substancave të ndaluara, mallrat nuk do të lejohen të hyjnë në territorin shqiptar.
AKU deklaron se po monitoron me kujdes situatën dhe po pret rezultatet e analizave për çdo produkt blegtoral që importohet nga Serbia.
Marrë nga Newsbomb.al
