Prania e kafshëve në rrugët e kryeqytetit për disa është shqetësuese, për disa të tjerë aspak. Më shqetësuese mesa duket është prania e qenve endacaktë në çdo hapësirë publike, lagje apo kudo.
Përtej kësaj, veprimet e punonjësve të Agjencisë së Mbrojtjes së Konsumatorit në Bashkinë e Tiranës, kanë revoltuar të dashuruarit me katërputroshët.
Hedhja e helmit me qëllim ngordhjen e tyre, ka revoltuar jo pak banorët e Tiranës, qytetarë të zakonshëm të cilët nuk ngurrojnë të denoncojnë.
Madje, bëjnë edhe thirrje për protestë, jo vetëm për kafshët, por edhe për të mbrojtur fëmijët të cilët nga pakujdesia mund të prekin këto helme vdekjeprurëse.
Qytetarët kujtojnë edhe rastin kur zyrtarja e AMK, Hermiona Hajdini kohë më parë vriste qentë me acid e me helme të ndryshme në rrugët e qytetit.
“Stop vrasjes së kafshëve, stop helmimi dhe abuzimit! Çdo jetë ka vlerë, çdo heshtje vret”. Këto janë fjalët e vullnetarëve që bëjnë thirrje për protestë të Enjten e 20 nëntorit në orën 11:00 në Sheshin Skënderbej në Tiranë.
Marrë nga Newsbomb.al
