David J. Kostelancik është ndër emrat e vetëm që ka mbetur i bllokuar në Senat, duke mos marrë ende aprovimin për të drejtuar Ambasadën Amerikane në Shqipëri.
Për shkak të përplasjeve mes Republikanëve dhe Demokratëve, fillimisht u bllokua emërimi i afro 50 ambasadorëve, mirëpo tani kanë mbetur vetëm dy: David J. Kostelancik, i nominuar për të qenë ambasador në Tiranë dhe Robert William Forden, i nominuar për të qenë ambasador në Kamboxhia. Gjithë të tjerët e morën aprovimin, por këta të dy akoma.
Në një shkrim të “Washington Post”, thuhej se një ndër personat që ka sjellë këtë bllokadën është J.D. Vance, senatori i zgjedhur nga Donald Trump për zv/president.
“I armatosur me një pyetësor mbi çështjet kryesore sociale në lidhje me të drejtat e homoseksualëve dhe lezbikeve, kujdesin për tranzicionin gjinor dhe praktikat e punësimit në lidhje me diversitetin, barazinë dhe përfshirjen, Vance (R-Ohio) mbajti të bllokuar për më shumë se një vit nominimet e dhjetëra diplomatëve të caktuar”, thuhej në artikull.
Ai shkonte deri aty sa pyeste kandidatët nëse do të rrisnin numrin e “banjove neutrale nga pikëpamja gjinore” në ambasadat amerikane, do të rrisnin burimet për “disforinë gjinore dhe tranzicionin gjinor”, etj.
Në artikull thuhej se mes të bllokuarve është dhe emri që Biden ka propozuar për në Tiranë. Ndërkohë sot Senati ka publikuar axhendën e punës dhe emri i Kostelancik është sërish aty. Pra ai dhe Robert William Forden janë të vetmit ambasadorë që presin nominimin.
Tani që J.D. Vance u nominua për zv/president dhe do i kushtohet fushatës, ndoshta ka një dritë jeshile për Kostelancik. Ende nuk dihet se pse po mbahet i bllokuar Kostelancik. A mos vallë ka ndonjë skenar që Republikanët duan që ta propozojnë ata ambasadorin, duke pritur fitoren e zgjedhjeve. Mbetet të shihet, por Ambasada Amerikane në Shqipëri ka 1 vit pa ambasador.
