Qindra biznese po përballen me një situatë të papreçedentë, që nëse nuk zgjidhet rrezikon të krijojë një spirale të rrezikshme borxhi në sistemin financiar të vendit. Arrestimi i drejtorëve të Autoritetit Rrugor Shqiptar dhe Korporatës Elektroenergjetike ka bllokuar totalisht çdo pagesë nga këto dy institucione.
Të dhënat nga thesari i shtetit tregojnë se pagesa e fundit nga Autoriteti Rrugor Shqiptar është bërë në datën 21 nëntor, rreth 3 javë më parë. Pas kësaj date ARRSH nuk ka ekzekutuar më asnjë pagesë për bizneset që janë të angazhuara në kontrata publike.
Kjo po krijon një situatë bllokimi në ekonomi dhe sistemin financiar të vendit, e cila për çdo ditë që kalon bëhet edhe më shqetësuese. ARRSH është institucioni publik me fluksin më të madh të pagesave publike. Bllokimi i pagesave prej gati tre javësh i heq ekonomisë qindra milionë euro pagesa. Kjo për shkak se dhjetori është muaji ku ekzekutohet fluksi më i lartë i pagesave publike.
Situata bllokuese përveçse frenon qarkullimin e parasë në ekonomi dhe vendos në vështirësi serioze bizneset, të cilat kryejnë punët publike, është duke cënuar realizimin e buxhetit. Një burim nga ministria e Financave i tha Kapitalit se nëse situata nuk zgjidhet shpejt, buxheti i shtetit mund të shënojë një nga shifrat më të ulëta të realizimit të investimeve publike.
Nuk është e qartë se pse qeveria po heziton të ndërhyjë për të zëvendësuar drejtorët e arrestuar nga SPAK. Në rastin e drejtorëve situata mund të zgjidhet lehtësisht edhe me delegim firme, pasi si Gjyli ashtu dhe Elezi nuk janë të pezulluar nga detyra, por kanë vetëm masën e arrestit të shtëpisë.
Marrë nga Kapitali.al
