Situata më problematike në qarkun Korçë vijon të lidhet me rrëshqitjet e dherave, të cilat kanë shkaktuar bllokim rrugësh, evakuime familjesh dhe vështirësi në qarkullim në disa zona.
Në bashkinë Pogradec, rrëshqitjet e dherave mbeten shqetësimi kryesor. Gjatë ditës së djeshme, inxhinierët e Shërbimit Gjeologjik kanë inspektuar zonat problematike, përfshirë fshatrat Cërravë dhe Dardhas, ku janë evakuuar familje, si edhe zonën pranë rezervuarit të Stropckës. Autoritetet presin raportet teknike për të vendosur mbi ndërhyrjet e nevojshme.
Në Njësinë Administrative Trebinjë, vijon të jetë e bllokuar rruga Dunicë, ndërsa sot pritet një tjetër inspektim nga specialistët, pasi rrëshqitja është e përmasave të mëdha. Po ashtu, rruga e fshatit Malinë mbetet jofunksionale; megjithëse është siguruar një mjet për ndërhyrje, puna nuk mund të kryhet për shkak të kushteve të pafavorshme të motit.
Në Njësinë Administrative Proptisht, rruga Zall–Torra vijon të jetë e bllokuar, ndërsa në fshatin Verrri është riaktivizuar një rrëshqitje e ndodhur rreth tetë vite më parë, duke rritur rrezikun për zonën.
Nga ana tjetër, aksione problematike rrugore raportohen edhe nga ARRSH – Rajoni Qendër–Lindje, ku reshjet e borës dhe aluvionet në formë balte, kryesisht në zonën e Lozhanit, kanë krijuar vështirësi në disa segmente, megjithëse po punohet për pastrim dhe kriposje.
Probleme janë evidentuar edhe në furnizimin me energji elektrike. Sipas OSSHEE Rajoni Korçë, disa zona rurale në Korçë, Bilisht, Ersekë dhe Pogradec vijojnë të jenë pjesërisht pa energji elektrike, duke prekur dhjetëra abonentë dhe disa antena transmetimi. Ekipet operative ndodhen në terren dhe janë në gatishmëri për riparimin e defekteve.
Marrë nga Syri.net
