Mëngjesin e 13 marsit, një oficer i ri i Marinës Franceze doli të vraponte në kuvertën e anijes luftarake në të cilën ai shërben, duke regjistruar performancën e tij nëpërmjet një ore “inteligjente” ku kishte instaluar aplikacionin Strava. Ishte pikërisht ky i fundit që “tradhtoi” pozicionin e aeroplanmbajtëses franceze “Charles de Gaulle” dhe anijeve shoqëruese të saj në Mesdhe.
Për më shumë se dy vjet, gazeta franceze “Le Monde” kishte ndjekur pothuajse çdo ditë një pjesë të konsiderueshme të personelit ushtarak të Francës nëpërmjet këtij aplikacioni. Sipas një lajmi të gazetës franceze, lëvizjet e pjesëtarëve të forcave të armatosura të këtij vendi mund të monitorohen, madje edhe në zona të ndjeshme, duke vënë në rrezik si operacionet ushtarake ashtu edhe ushtarët që marrin pjesë në to.
Që nga shkurti i vitit 2024, në një projekt kërkimor në shkallë të gjerë, “Le Monde” arriti të përpilojë një listë prej 18,599 profilesh aktive në afërsisht 100 baza ushtarake franceze, si në Francë ashtu edhe jashtë saj. Këto profile u përkasin disa mijërave personel ushtarak (ose bashkëpunëtorë të jashtëm që punojnë në emër të Ministrisë Franceze të Mbrojtjes) të të gjitha gradave dhe specialiteteve, të cilët, duke ushtruar profesionin e tyre në cepat e largët të botës, publikojnë performancat e tyre në profilet e tyre publike në Strava, duke zbuluar aktivitetet e forcave të armatosura franceze, nga më të zakonshmet deri te më të sekretet.
Që nga ajo kohë, duke automatizuar gjurmimin, gazeta ka krijuar një hartë ditore me shpërndarjen gjeografike të aktiviteteve të tyre sportive në pothuajse kohë reale. Më 13 mars, gazeta vuri re një ushtar duke vrapuar… në mes të Detit Mesdhe, duke konfirmuar kështu vendndodhjen e aeroplanmbajtëses “Charles de Gaulle” dhe shoqëruesve të saj.
Gazeta arriti të identifikonte më shumë se 1,000 vende në ditë gjatë një periudhe 2-vjeçare. Së bashku, profilet publike të këtij aplikacioni lejohet nxjerrja e një sasie të madhe informacioni rreth aktiviteteve të personelit ushtarak dhe, rrjedhimisht, të ushtrisë franceze.
Ushtarët po stërviteshin në bazat ku “Le Monde” arriti t’i gjurmonte, por edhe pranë shtëpive të tyre në të gjithë Francën. Disa i kaluan pushimet në Spanjë, Shtetet e Bashkuara ose Tajlandë, ndërsa të tjerë udhëtuan në Itali me shokët e tyre, informacion që bën të mundur vlerësimin e disponueshmërisë së njësive të caktuara ose edhe mbledhjen e të dhënave personale mbi ushtarë të caktuar (nga adresat e tyre deri te shoqatat e tyre personale).
Siç është vënë në dukje, ky hulumtim ishte i mundur sepse profilet e Strava ishin publike dhe të arritshme për të gjithë. Siç tregon hulumtimi i gazetës, gjatë kësaj periudhe, dhe pavarësisht zbulimeve në kontekstin e të ashtuquajturave #StravaLeaks në vjeshtën e vitit 2024, vetëm një pakicë e vogël përdoruesish ndryshuan cilësimet e tyre të privatësisë. Pas një viti monitorimi, 1,372 profile – një numër që korrespondon me vetëm 7% të listës së Le Monde – ishin konvertuar në “privatë” në aplikacionin e aktivitetit sportiv.
“Problemi i sigurisë që paraqet aplikacioni i fitnesit Strava nuk është vetëm rezultat i gabimeve individuale nga disa personel ushtarak, por ka marrë një karakter vërtet sistemik. Dhe kjo, pavarësisht faktit se duhen vetëm disa klikime për të vendosur një profil si privat”, vëren gazeta.
Marrë nga Le Monde
