Koalicioni për Reforma, Integrim dhe Institucione të Konsoliduara (KRIIK), monitoroi mbi baza tërësisht vullnetare procesin e Zgjedhjeve të Pjesshme për Kryetarin e Bashkisë Himarë, të datës 4 gusht 2024. Në raportin e bërë publik ditën e sotme (5 gusht), Kriik ka bërë një rezyme të qartë të të gjitha shkeljeve ligjore dhe antikushtetuese të ndërmarra nga mazhoranca socialiste, që nga kërkesa për Presidentin e Republikës për caktimin e datës së zgjedhjeve në Himarë dhe vendimin antiligjor dhe të njëanshëm të këtij të fundit, duke mos respektuar afatet ligjore, te mos veprimi i qëllimshëm i KQZ-së për të zgjidhur problemin e mbi 6 mijë banorëve të cilëve iu mohua e drejta kushtetuese për të votuar vetëm sepse i kishte mbaruar afati i kartave ID. Po ashtu në raport thuhet se përdorimi i administratës dhe burimeve shtetërore në favor të kandidatit socialist Vangjel Tavo, si fushata me certifikatat e pronësisë të himarjotëve, dhe prezenca e personave të paautorizuar në qendra e votimit, të cilët ndikuan votuesit.
Raporti thekson qartë se këto zgjedhje nuk ishin të lira, të ndershme dhe demokratike, pasi i gjithë aparati shtetëror politik socialist ishte përgjatë muajve të fundit në Himarë duke bërë fushatë për kandidatin Vangjel Tavo me burimet shtetërore, si dhe duke bërë presione ndaj votuesve. Sipas KRIIK, komisionerët u kërkuan votuesve të firmosin në listë edhe pse ishin identifikuar nëpërmjet PEI-t. Kriik thotë se sipas Kodit Zgjedhor, zgjedhësi nënshkruan në listën e zgjedhësve vetëm nëse ai është në këtë listë dhe nuk ka qenë i mundur identifikimi nëpërmjet PEI-t.
“Personat e paautorizuar që qëndronin pranë qendrave të votimit ose ishin të pajisur me lista ose, kryesisht në fshatrat e vegjël, nuk e mbanin një të tillë për shkak se komuniteti është i vogël dhe njihen më me njëri-tjetrin. Kjo u mundësonte të kishin informacion të plotë mbi personat që paraqiteshin për të votuar”, thuhet në raportin e KRIIK.
