Kryetari i Partisë Demokratike, Sali Berisha, ka reaguar pas deklaratave të eurodeputetit çek Tomas Zdeçovski, i cili akuzon kryeministrin Edi Rama lidhur se me anë të familjarëve të tij, po transporton para jashtë vendit.
Gjatë konferencës së sotme për mediat, Berisha deklaroi se heshtja e Ramës dhe e mediave shqiptare për këtë çështje është një tregues i kontrollit që, sipas tij, kryeministri ushtron mbi informacionin publik.
Sipas kryetarit të PD-së, eurodeputeti Zdeçovski ka përdorur një nga parimet kryesore të hetimit të krimit të organizuar, atë të ndjekjes së parave.
Ai akuzoi Edi Rama se nuk ka dhënë asnjë përgjigje për deklaratat e eurodeputetit. Lideri i opozitës akuzoi mediat e kapura nga pushteti i Edi Ramës se kanë censuruar lajmin.
Berisha bëri të ditur se Partia Demokratike do të rikthejë kërkesën për ngritjen e një komisioni hetimor parlamentar për këtë çështje, duke kërkuar hetim edhe nga institucionet ndërkombëtare.
Kryetari i PD-së Sali Berisha, u shpreh se, ka të dhëna që kërkojnë verifikim për përdorimin e avionit privat të kryeministrit dhe për lëvizjet jashtë vendit.
Lideri i demokratëve Sali Berisha i bëri thirrje institucioneve ndërkombëtare që të përfshihen në hetim.
Marrë nga Dosja.al
