Gjyqtarët dhe magjistratët kanë përshkallëzuar përplasjen për pagat, duke kallëzuar në SPAK ministrin e Financave, Petrit Malaj, sekretarin e Përgjithshëm të ministrisë dhe përfaqësues të Thesarit.
Ngërçi lidhet me moszbatimin e formulës së re të pagave, pas vendimit të Gjykatës Kushtetuese që përcaktoi detyrimet e institucioneve për rishikimin e pagave të magjistratëve.
Çështja ka shkaktuar përplasje edhe në politikë, ndërsa kryeministri Edi Rama ka reaguar duke thënë se për pagat e magjistratëve vendimmarrja i takon Kuvendit.
Rama ka ironizuar situatën, duke thënë se në kallëzimin e bërë në SPAK mungon vetëm emri i tij. • Problemi nisi pasi Kuvendi nuk miratoi brenda afatit të përcaktuar formulën e re të pagave.
Këshilli i Lartë Gjyqësor dhe Këshilli i Lartë i Prokurorisë vijuan me përllogaritjen e pagave sipas vendimit të Kushtetueses, ndërsa Ministria e Financave nuk ekzekutoi listëpagesat e reja, duke argumentuar se përcaktimi i formulës së pagave është kompetencë e Kuvendit.
Për shkak të kësaj situate, gjyqtarët dhe prokurorët kanë mbetur pa pagat e muajit gusht, ndërsa bojkoti është shtrirë edhe në administratën gjyqësore.
Punonjësit dhe sekretarët e Gjykatës së Tiranës kanë ndërprerë shërbimet, ndërsa në gjykata vijojnë vetëm seancat për vlerësimin dhe caktimin e masave të sigurisë.
Ndërkohë, Gjykata Kushtetuese ka rikujtuar se vendimi i saj për pagat është përfundimtar dhe i detyrueshëm për zbatim, duke theksuar se autoritetet përgjegjëse duhet ta zbatojnë atë në tërësinë e tij.
Marrë nga Dosja.al
