Banorët e Marinzës kanë vendosur të ngujohen mbrëmjen e kësaj të enjte në zyrat e kompanisë kineze naftënxjerrëse, “Bankers Petroleum”, duke këmbëngulur për një zgjidhje përfundimtare për qiratë e tokave.
Bëhet fjalë për rreth 20 banorë të fshatrave të zonës, të cilët në shenjë proteste për problematikën e qirave të tokave, çmimin e të cilave kompania e ka përgjysmuar, kanë vendosur të ngujohen.
Ata kanë deklaruar se do të qëndrojnë në zyrat e kompanisë gjatë gjithë natës, deri në momentin që drejtuesit kinezë të “Bankers Petroleum” të marrin një vendim duke caktuar një përfaqësues që të zgjidhin problematikën e krijuar prej disa javësh.
Banorët e fshatrave në zonën e Patos-Marinzës kërkojnë nga kompania që t’u paguajë qiranë për zënien e tokave të tyre, sipas një kontrate të nënshkruar në vitin 2010. Ata nuk kanë marrë pagesën vjetore dhe pavarësisht se ka kaluar më tepër se gjysma e vitit 2026, kompania ende nuk ka bërë pagesën e detyrimeve ndaj tyre, për dhjetëra hektarë tokë në përdorim.
Banorët e fshatrave Marinëz, Belinë, Sheqishte, Zharrëz, Kallm, Frashër dhe Kuman deklarojnë se rreth 800 persona nuk kanë marrë pagesën vjetore të qirasë që prej fillimit të vitit 2026. Sipas tyre, tokat përdoren nga kompania për rrugë, parkingje, sheshe dhe puse nafte prej vitit 2010.
Ata kërkojnë respektimin e marrëveshjeve ekzistuese të nënshkruar mes palëve dhe kundërshtojnë tentativën për ndryshim të njëanshëm të kontratës, nga pagesë vjetore në dyvjeçare, si dhe uljen e vlerës së qirasë nga 400 lekë në 200 lekë për metër katror.
Të ardhurat nga qiraja e tokave përbëjnë një nga burimet kryesore të të ardhurave familjare, pasi ato janë marrë në përdorim nga kompania Bankers Petroleum dhe prej vitit 2010, ata as mund të shkelin në këto toka, edhe përse janë pronë e tyre.
Marrë nga Newsbomb.al
