Një stuhi e fuqishme goditi të enjten një pjesë të madhe të Italisë, duke shkaktuar dy viktima, përmbytje, rrëshqitje dheu dhe probleme të mëdha në komunikacion. Zjarrfikësit kryen qindra ndërhyrje në të gjithë vendin, ndërsa situata ishte veçanërisht e rëndë në veri të vendit dhe në Toskanë.
Në Latisana, pranë Udines, një grua humbi jetën pasi makina e saj mbeti e bllokuar në një nënkalim të përmbytur. Ajo u mbyt në automjet, pavarësisht përpjekjes së karabinierëve për ta shpëtuar.
Zona mes Latisanës dhe Lignanos u godit nga përmbytje të mëdha, ndërsa lumi Tagliamento doli nga shtrati. Në San Michele al Tagliamento, zjarrfikësit shpëtuan nga një makinë të bllokuar për shkak të motit të keq një grua shtatzënë.
Moti i keq shkaktoi probleme në të gjithë vendin. Në Valtellina, 45 persona u evakuuan për shkak të rrëshqitjeve të dheut, ndërsa në Toskanë u regjistruan më shumë se 63 mijë goditje rrufeje.
Në ishullin Elba, një stuhi e fuqishme për vetëm rreth 20 minuta përmbyti pjesë të Portoferraios, ndërsa në Cecina ranë më shumë se 80 milimetra shi për më pak se dy orë.
Stuhi pati edhe në Trieste, ku disa rrugë u mbuluan nga 15 centimetra ujë. Në Romë u rrëzuan pemë dhe degë, u përmbytën rrugët, ndërsa një rrufe i vuri flakën një pishe. Zjarrfikësit shpëtuan edhe shoferë që kishin mbetur të bllokuar në automjete.
Probleme u raportuan edhe në Milano, Verona, Liguria dhe rajonin Marche. Në Ligurai, përroi Lavagna doli nga shtrati për të dytën ditë radhazi, duke shkaktuar evakuimin e shkollave dhe mbylljen e disa urave, ndërsa pranë Portofinos dhe Santa Margherita Ligure u vunë re tromba detare.
Marrë nga Reporteri.net
