Një bandë shqiptare e drogës është shkatërruar nga Policia Federale Gjyqësore e Belgjikës. Një “broker kriminal” nga Anversa ishte ndërmjetësi mes grupeve në Shqipëri dhe Amerikën Latine. Ai ishte gjithashtu në kontakt me një shqiptar të dyshuar për vrasje në Itali, Gerd Gjinarari si njohur si “Gjeneralin”. Tetë të dyshuar janë arrestuar, nga të cilët katër janë mbajtur në arrest.
Hetimi nisi pothuajse një vit më parë, kur policia kishte marrë informacion se në një apartament në Anversë dyshohej se ruheshin sasi të mëdha kokaine. Gjatë hetimeve të mëtejshme, në fokus doli një 48-vjeçar si banor i apartamentit. Ai dyshohet se ishte një ndërmjetës që kishte kontakte me grupe nga Shqipëria dhe Amerika Latine për importimin e kokainës, ndër të tjera përmes portit të Anversës, si dhe me grupe kontrabande nga Evropa dhe madje edhe Australia.
“Dyshohet se 40-vjeçari koordinonte grupet e ndryshme që merreshin me dërgimin, nxjerrjen dhe shpërndarjen e drogës. Ai dyshohet se ofronte mënyra të ndryshme për trafikimin e drogës, mund të kërkonte ndihmë, për shembull, nga punonjës sigurie dhe drejtonte personat që nxirrnin drogën.”, tha Kristof Aerts, zëdhënësi i Prokurorisë së Anversës.
Në kuadër të hetimit dolën në pah edhe disa ekipe që merreshin me nxjerrjen e drogës. Në fillim të këtij viti, policia mundi të sekuestronte dy ngarkesa kokaine prej 46 dhe 53 kilogramësh.
Në qershor u zbulua se i dyshuari kryesor kishte kontakte me një shqiptar 52-vjeçar, Gerd Gjinarari i cili kërkohej ndërkombëtarisht për një vrasje të kryer në vitin 1997 në Itali. Ekipi për Kërkimin Aktiv të të Arratisurve (FAST) i Policisë Federale mundi ta arrestonte personin. Procesi i ekstradimit të tij drejt Italisë është ende në vazhdim.
Bëhet fjalë për shqiptarin famëkeq Gerd Gjinarari, i njohur me nofkën “Gjenerali”. Në vitin 1997 ai qëlloi për vdekje një rival në një spital në Milano, me një pistoletë që ishte fshehur mes një buqete me lule. Pothuajse tridhjetë vjet më vonë, tashmë 52-vjeçari është arrestuar sërish, këtë herë në Anversë.
Gjatë kontrolleve, policia gjeti ndër të tjera disa armë zjarri dhe municione në hapësira të fshehta, jelekë antiplumb, bllokues sinjali, para cash, një makinë për numërimin e parave, pasaporta dhe karta shtypi të falsifikuara, presa dhe kallëpe për prodhimin e blloqeve të kokainës.
Më pas, gjyqtari hetues paraqiti gjashtë të dyshuar para gjykatës. Nga këta, katër persona u arrestuan, një person u lirua me kushte dhe një person tjetër u la i lirë pa kushte. Hetimi gjyqësor nga Policia Federale Gjyqësore e Anversës, nën drejtimin e gjyqtarit hetues, vazhdon.
Në kuadër të hetimit u bashkëpunua ngushtë me vende të tjera dhe me Europolin. Kjo mund të çojë në arrestime edhe jashtë vendit. Si pasojë e ndërhyrjes, në Shqipëri tashmë është sekuestruar një ngarkesë prej 37 kilogramësh kokainë, e fshehur në një kontejner frigoriferik.
Marrë nga Dpgmedia.nl
