Arben Ndreka, biznesmeni pas kompanisë së njohur për produktet e qumështit “Lufra”, ka hyrë në një biznes të ri ndërtimi së bashku me vëllezërit Anea dhe Aldi Llazi.
Në qendër të kësaj historie është një kompani me një emër domethënës:
“BORSH BAY”
Shoqëria është themeluar më 21 janar 2025, me një kapital fillestar prej vetëm 400 mijë lekësh.
50% e kompanisë zotërohet nga ADG, ish-“Lufra”, ndërsa 50% tjetër nga kompania LLAZO.
Në regjistrin e pronarëve përfitues, Arben Ndreka rezulton me 42.8%, ndërsa Anea dhe Aldi Llazi me nga 25%.
Por ajo që tërheq vëmendjen është objekti i aktivitetit.
“Borsh Bay” mund të operojë në ndërtim, infrastrukturë, projektim, punime civile, energjetikë dhe tregtim materialesh ndërtimi.
Dhe emri i kompanisë të çon drejtpërdrejt në një prej zonave më të lakmuara të rivierës shqiptare: Borshin.
NGA QUMËSHTI, TE NDËRTIMI
ADG, kompania e njohur historikisht si “Lufra”, e ka pasur aktivitetin kryesor të lidhur me përpunimin dhe tregtimin e qumështit.
Por në vitin 2024, objektit të saj të aktivitetit i është shtuar edhe ndërtimi.
Pak muaj më vonë krijohet “Borsh Bay”.
Në të njëjtën shoqëri futet edhe LLAZO, kompani e njohur në sektorin e ndërtimit dhe kontratave publike.
Sipas të dhënave publike, LLAZO rezulton me dhjetëra kontrata me institucione të pushtetit vendor, me një vlerë totale prej qindra milionë lekësh.
Pra, në një kompani të vetme bashkohen:
kapitali i industrisë ushqimore dhe eksperienca e një kompanie të lidhur prej vitesh me ndërtimin dhe kontratat publike.
PO ÇFARË DO TË NDËRTOHET NË BORSH?
Këtu fillojnë pyetjet.
Në të dhënat publike të verifikuara deri tani nuk rezulton e qartë një leje ndërtimi apo dokumentacion që të tregojë konkretisht se çfarë projekti do të zhvillojë “Borsh Bay”.
Nëse bëhet fjalë për një kompleks turistik apo resort, mbeten disa pyetje thelbësore:
Ku ndodhet prona?
Kush e zotëron tokën?
Sa është sipërfaqja që do të zhvillohet?
A është marrë leje zhvillimi apo leje ndërtimi?
Dhe mbi të gjitha: sa do të kushtojë investimi dhe nga do të vijë financimi?
Këto janë dokumentet që duhet të tregojnë historinë e vërtetë të “Borsh Bay”.
Sepse për momentin një gjë është e dokumentuar:
Arben Ndreka dhe vëllezërit Llazi janë bërë ortakë në një kompani ndërtimi që mban emrin e një prej zonave më të vlefshme turistike të jugut të Shqipërisë.
Marrë nga Ngrihu.media
