Granit Xhaka ka tronditur opinionin sportiv duke pranuar blerjen e një certifikate të falsifikuar vaksinimi. Në mbrojtje të rekordmenit të kombëtares zvicerane, ai ka marrë përgjegjësinë për këtë veprim. Edhe pse reagimi vjen me vonesë, ky ndërgjegjësim në minutën e fundit mbetet i rëndësishëm.
Tashmë, pyetja e pashmangshme që po qarkullon në korridoret e futbollit është: Çfarë do të ndodhë me shiritin e kapitenit? Xhaka pritet të ketë së shpejti një dosje penale. A mbetet ai zgjedhja e duhur për të udhëhequr ekipin në këto kushte? Për këtë dilemë, duhen theksuar dy pika: së pari, një dënim i tillë nuk të skualifikon automatikisht nga ky rol. Së dyti, të gjithë brenda kombëtares e dinë një fakt të pakundërshtueshëm: kur Granit Xhaka është aty, është ai që komandon.
Problemi i vërtetë përpara grumbullimit të radhës në nëntor është shumë më i madh se sa çështja e kapitenit. Pyetja thelbësore është: A do të vazhdojë Xhaka të jetë pjesë e ekipit kombëtar apo jo? Trajneri Murat Yakin, në bashkëpunim me drejtorin sportiv Jurendiç, duhet të japin një përgjigje përfundimtare. Vetë Xhaka mund t’i ndihmojë, nëse tregon përulësinë e duhur dhe jep shpjegime bindëse. Shpërqendrimet që ai ka shkaktuar vazhdimisht në të kaluarën duhet të mbeten përfundimisht pas krahëve.
Ai ende duhet ta vërtetojë këtë në praktikë. Siç dihet tashmë, futbollisti shqiptar ndezi sërish polemika, pasi e pa të arsyeshme të shprehte solidaritet me ish-Presidentin e Kosovës, Hashim Thaçi, në profilin e tij në Instagram. Një deklaratë e thatë ndjese në rrjetet sociale për skandalin e Covid-it nuk është më e mjaftueshme. Një kapiten i vërtetë e di shumë mirë këtë.
Marrë nga Albinfo.ch
