Gazeta satirike franceze ‘Charlie Hebdo’ është vënë sërish në qendër të kritikave e sulmeve për shkak për një karikature në lidhje me Linë e Majmunëve. Por këtë herë nuk janë myslimanët që kanë kritikuar revistën, por të krishterët. Kjo pasi në karikaturët e gazetës franceze është publikuar portreti i ‘Shën Marisë’ të infektuar me Linë e Majmunëve.
Dy shoqata katolike, Marie de Nazareth dhe La petite Voie, kanë paraqitur një ankesë në gjykatën e Parisit kundër të përjavshmes satirike Charlie Hebdo, e akuzuar për “provokim dhe nxitje të urrejtjes fetare”. Revista u kritikua pasi publikoi, më 16 gusht, një karikaturë të Virgjëreshës Mari të pikturuar me simptomat e lisë së majmunëve dhe duke e fyer rëndë atë. Ankesa u bë kundër karikaturistit Pierrick Juin dhe kundër Riss, drejtor editorial i Charlie Hebdo.
Tribune Chrétien e ka denoncuar gjithashtu karikaturën, duke folur për nxitje të padëshiruar të urrejtjes ndaj katolikëve të Francës dhe nisi një peticion për të marrë tërheqjen e karikaturës që konsiderohej fyese, provokuese, duke nxitur urrejtje në mënyrë eksplicite ndaj komunitetit katolik. Peticioni ka mbledhur gati 25 mijë firma. Karikatura u denoncua ashpër edhe nga disa njerëz fetarë, veçanërisht nga peshkopi i Bayonne Marc Aillet, i cili shkroi se liria e shprehjes nuk mund të justifikojë një karikaturë kaq të neveritshme.
