Autoriteti Rrugor Shqiptar ka nisur diskutimet për projektin e zgjerimit të autostradës Tiranë-Durrës dhe anasjelltas. Drejtori Gentian Gjyli po zhvillon takime intensive me palët e përfshira dhe sot ka pritur përfaqësuesit e Bashkisë Tiranë, shefin e Policisë Rrugore dhe nënkontraktorët.
Ata kanë diskutuar nga afër për planin e devijimit dhe menaxhimit të trafikut. Me rënien dalëngadalë të fluksit turistik në vend, do të merren të gjitha masat që të fillojnë menjëherë punimet për zgjerimin e këtij aksi të rëndësishëm.
Autostrada Tiranë-Durrës dhe anasjelltas është një ndër nyjet më të rëndësishme rrugore në Shqipëri, e cila me rritjen e numrit të turistëve dhe përdoruesve të mjeteve në tërësi, ka nevojë urgjente për ndërhyrje.
Me ndërhyrjet e planifikuara në tabanin e këtij aksi, gjerësia planifikohet të shkojë në 35.1 metra, nga 18.6 metra që është aktualisht, sepse do të ndërtohen nga dy korsi për çdo krah. Në total, autostrada do të ketë 4 korsi në drejtim të Durrësit dhe 4 në drejtim të Tiranës.
Shpejtësia e lejuar do të jetë 40 km/h, nga 90 që është aktualisht. Në segmente të caktuara të autostradës, shpejtësia e lejuar është edhe më e ulët.
Zgjerimi i Tiranë-Durrës pritet ti kushtojë buxhetit të shtetit plot 298.8 milionë euro, ndërsa paralelisht do të punohet dhe për rehabilitimin e plotë të rrugës dytësore Tiranë-Ndroq-Plepa, që mund të shërbej si alternative nëse autostrada Tiranë-Durrës bëhet me pagesë.
