Tre ngjarje të rënda janë regjistruar gjatë orëve të para të mëngjesit në Tiranë dhe zonat përreth, ku një person ka mbetur i plagosur me armë zjarri, një shpërthim me lëndë plasëse ka dëmtuar dy automjete, ndërsa një këmbësor ka humbur jetën në një aksident rrugor.
Rrreth orës 01:00, në rrugën “Medar Shtylla”, dyshohet se një 28-vjeçar ka plagosur me armë zjarri një 22-vjeçar. I plagosuri ndodhet në spital, nën kujdesin e mjekëve, ndërsa autori i dyshuar është shpallur në kërkim.
Rreth 15 minuta më vonë, në rrugën “Lidhja e Prizrenit”, një sasi lënde plasëse dyshohet se ka shpërthyer në oborrin e banesës së një 56-vjeçari. Si pasojë e shpërthimit janë dëmtuar dy automjete të parkuara në oborr.
Ndërkohë, një aksident me pasojë vdekjen është regjistruar rreth orës 05:45 në Fushë Prezë. Sipas Policisë, një 35-vjeçar duke drejtuar automjetin, ka përplasur një 58-vjeçar, i cili ka humbur jetën. Me drejtuesin e automjetit po kryhen veprimet procedurale, ndërsa grupet hetimore vijojnë punën për dokumentimin e plotë të të treja ngjarjeve.
Marrë nga Dosja.al
