Qeveria greke po planifikon të ndalojë ndërtimin e hoteleve të reja në Santorini, pasi sipas ekspertëve të mjedisit, ishulli po përballet me një përzierje toksike të mbizhvillimit dhe turizmit masiv.
Sipas medias ndërkombëtare Telegraf, projektligji i ministrisë së mjedisit që pritet të miratohet nga Parlamenti këtë sesion të ri parlamentar synon ndalimin e të gjitha punimeve të reja, përfshirë edhe zgjerimet në strukturat ekzistuese dhe pishinat.
Santorini dhe Mykonos kanë parë një bum në numrin e turistëve në vitet e fundit, i nxitur nga reklamimi në mediat sociale, aplikacionet e qirasë afatshkurtra si Airbnb dhe një rritje në udhëtime pas pandemisë.
Santorini ka 25,000 banorë, por vizitohet nga miliona turistë çdo vit, gjë që ka ndikuar në shkatërrimin e mjedisit dhe mungesën e ujit.
Çështja e mbiturizmit doli në qendër të vëmendjes muajin e kaluar kur një guidë turistike postoi imazhe të një turme turistësh që zbarkonin në Santorini, që kalonin krah për krah përgjatë rrugëve të ngushta midis shtëpive të bardha.
Ndalimi i ndërtesave të reja përgjatë zonës më të frekuentuar turistike të ishullit, vjen edhe pas thirrjeve të vetë kryebashkiakut të Santorinit drejtuara autoriteteve vendase.
