Norvegjia mund të ndërtojë së shpejti një gardh përgjatë një pjese ose të gjithë kufirit 198 kilometra që e ndan me Rusinë, ka bërë të ditur ministrja norvegjeze e Drejtësisë, Emilie Enger Mehl.
“Një gardh kufitar është shumë interesant, jo vetëm sepse mund të veprojë si një parandalues, por edhe sepse përmban sensorë dhe teknologji që ju mundësojnë të zbuloni nëse njerëzit po lëvizin afër kufirit”, ka deklaruar ministrja Enger Mehl në një intervistë për transmetuesin publik norvegjez NRK.
Ajo ka thënë se qeveria norvegjeze po shikon aktualisht “disa masa” për të forcuar sigurinë në kufirin me Rusinë në veriun e Arktikut, të tilla si rrethimi, rritja e numrit të stafit kufitar dhe rritja e monitorimit.
Nëse situata e sigurisë në zonën delikate të Arktikut përkeqësohet, qeveria norvegjeze është e gatshme të mbyllë kufirin shumë shpejt, ka thënë Enger Mehl, e cila vizitoi Finlandën fqinje këtë verë për të mësuar se si e gjithë vija e saj kufitare me Rusinë prej 1,340 kilometra është mbyllur.
Qeveria finlandeze ka mbyllur të gjitha pikat e kalimit nga Rusia në Finlandë në fund të vitit 2023 pasi më shumë se 1,300 migrantë të vendeve të treta pa dokumentacion ose viza të duhura, hynë në vend brenda tre muajsh, vetëm disa muaj pasi vendi u bë një vend anëtar i NATO-s.
I frymëzuar nga projekti i Finlandës, Enger Mehl ka thënë se një gardh i tillë mund të jetë gjithashtu një ide e mirë për Norvegjinë.
“Është një masë që mund të bëhet e rëndësishme në të gjithë ose një pjesë të kufirit midis Norvegjisë dhe Rusisë”, ka shtuar Enger Mehl.
