Ka nisur rreth ores 18.00 protesta kombëtare e thirrur nga opozita. Sic kishte lajmëruar Partia Demokratike protesta nisi para godinës së kryeministrisë dhe më pas u shtri në të gjitha rrugët e Tiranës.
Një orë para protestës, Berisha theksoi se sot nis rrugëtimi i tyre drejt fitores, ndërsa u ka bërë thirrje qytetarëve që të bashkohen kundër narko-qeverisë. Në mesazhin e tij për qytetarët, ish-deputeti Ervin Salianji shprehet se qëndresa e tyre është “shpërbërja” e qeverisë. Ai ka bërë thirrje për reagim nga çdo qytetar, sipas tij për një Shqipëri më të mirë.
Burgosja e ish-ligjvënësit demokrat ishte dhe një nga motivet kryesore për thirrjen e një proteste kombëtare nga Partia Demokratike. Bëhet me dije se rreth 1500 forca policie janë në terren, duke nisur nga ato të rendit, FNSH, Shqiponjat janë në terren për mbarëvajtjen e protestës. Në gatishmëri janë edhe forcat RENEA.
Protestuesit u larguan nga kryeministria, ku hodhën molotov dhe fishekzjarre drejt godinës së institucionit. Po ashtu para kryeministrisë, pati një përplasje mes deputetëve demokratë dhe protestuesve me policinë, pasi u tentua të çahej kordoni policor. Siç është raportuar edhe më herët, skenari dhe itinerari i protestës nuk dihen, ndërsa mbeten enigmë vendet dhe pikat ku do të marshojë protesta.
Protestuesit e Partisë Demokratike kanë hedhur molotovë dhe fishekzjarrë me pas drejt selisë së Partisë Socialiste. Oborri i PS është përfshirë nga flakët. Vijon protesta edhe përpara bashkisë.
