Organizata e Akademikëve dhe Studentëve të Diasporës Shqiptare në Hamburg i është drejtuar kancelarit të Gjermanisë, Olaf Scholz, me një kërkesë që synon heqjen e shtetësisë serbe për kosovarët në Republikën Federale të Gjermanisë.
Në kërkesën e tyre, ata theksojnë rëndësinë e ndryshimit të ligjit të shtetësisë gjermane dhe udhëzimeve të ardhshme, duke kërkuar që shtetësia serbe të shfuqizohet për kosovarët dhe shqiptarët etnikë që jetojnë në Gjermani.
Sipas tyre, është e papranueshme që qytetarët kosovarë të vazhdojnë të regjistrohen me shtetësi serbe, përkundër faktit që Gjermania ka njohur pavarësinë e Kosovës që nga viti 2008.
Ata gjithashtu theksojnë se kjo situatë krijon ndasi të padrejta në trajtimin e qytetarëve, duke u konsideruar si diskriminim burokratik.
Për më tepër, fshirja e shtetësisë serbe kërkon një procedurë të gjatë dhe të kushtueshme, që sipas tyre vë në rrezik jetën e kosovarëve, të cilët detyrohen të përballen me përfaqësuesit e një shteti që dikur i shtypte.
Në përmbyllje, organizata ka kërkuar që kjo praktikë të përfundojë dhe të fshihet automatikisht shtetësia serbe për të gjithë kosovarët, duke përfshirë edhe fëmijët e lindur në Gjermani, të cilët nuk duhet ta trashëgojnë këtë shtetësi.
Me një komunitet prej 565,000 shqiptarësh të mirë integruar në Gjermani, organizata shprehet e gatshme për një takim me përfaqësuesit qeveritarë për të diskutuar më tej këtë çështje të ndjeshme.
