Pas zbulimeve të reja nga faksimilet e dosjes për skandalin e abuzimeve seksuale lidhur me investitorin e financave në SHBA Jeffrey Epstein dhe implikimit të ish-princit Andrew, Buckingham reagoi pa pritur nisjen zyrtare të hetimeve. Sipas një deklarate të lëshuar në mbrëmje (10.02.2026), një zëdhënës i pallatit tha se Mbreti tashmë ka shprehur shqetësimin e thellë lidhur me akuzat për sjelljen e vëllait të tij përmes fjalëve dhe veprimeve të paprecedenta.
Ai shtoi: “Akuzat specifike janë për t’u adresuar nga z. Mountbatten-Windsor. Nëse Policia e Thames Valley na kontakton, ne jemi gati t’i ndihmojmë sipas nevojës.” Mendimet dhe ngushëllimet e çiftit mbretëror janë gjithmonë me viktimat e çdo abuzimi, vijoi deklarata.
Më parë edhe princi i kurorës William dhe bashkëshortja e tij Kate kanë mbajtur qendrim: Çifti është “thellësisht i shqetësuar” për publikimet e fundit nga dosja Epstein, komunikoi zdhënësi i Pallatit Mbretëror. Princi dhe princesha kanë në mendje viktimat. Andrew ka humbur të gjitha nderimet, gradat ushtarake dhe titujt për shkak të përfshirjes së tij të dyshuar në skandalin e abuzimit të Epstein.
E-Mailet rëndojnë Andrew
Andrew në vitin 2010 i ka dhënë dokumente konfidenciale Epsteinit, sikurse del tani nga dosjet e publikuara. Duket se në këto dokumente bëhej fjalë për raporte lidhur me Hongkongun, Vietnamin dhe Singapurin, që Andrew i pati marrë në funksionin e tij atëherë si i ngarkuar i qeverisë britanike për tregtinë.
Në këtë kohë Epstein ishte dënuar për abuzim seksual me minorene. E-Mailet, që janë dërguar në fillim të vitit 2011, hedhin poshtë tani pretendimet e Andrews, se i pati ndërprerë kontaktet më përpara me Epsteinin.
Goditje e rëndë për Starmer
Tronditja prej dosjeve të reja ndërkohë ka shkaktuar një krizë qeveritare në Londër. Këtë të hënë (09.02.2026) dha dorëheqjen Tim Allan, drejtor i komunikimit të kryeministrit Keir Starmer.
Të dielën (08.02.2026) dha dorëheqjen një ndër këshilltarët më të rëndësishëm të Starmerit, Morgan McSweeney. Sfondi ka të bëjë me mbështetjen për Peter Mandelson, të cilin Starmer pavarësisht se diheshin lidhjet e tij me Epstein e emëroi ambasador në SHBA.
Humbja e dy punonjësve të nivelit të lartë njeri pas tjetrit konsideorhet si një goditje e rëndë për Starmer, i cili përpiqet ta mbyllë këtë aferë. Mandelson ndërkohë është shkarkuar nga detyra në Uashington.
Lidhur me këtë rast qarkullojnë një sërë teorish. Ndër to bëjnë pjesë edhe spekulimet, se Epstein ka vepruar nën mandatin e shërbimeve sekrete për të mbledhur material kompromentues për persona me influencë, në mënyrë që të mund të ushtrohej presion ndaj tyre.
Andrew më 2022 e zgjidhi me një marrëveshje në procesin civil të hapur nga Virginia Giuffre, e cila e akuzonte atë për abuzim seksual. Giuffre në prill kreu vetëvrasje. Andrew vazhdimisht i ka hedhur poshtë akuzat për qendrim abuziv, por lidhur me akuzat e fundit ai deri tani ka heshtur.
Edhe dorëheqje të tjera lidhur me aferën Epstein
Zbulimet lidhur me aktivitetet abuzive të Epstein po nxjerrin në pah gjithnjë e më shumë persona. Në fundjavë dha dorëheqjen diplomatja norvegjeze e karrierës Mona Juul për shkak të lidhjeve të saj me Epstein. Princesha e kurorës Mette-Marit kërkoi ndjesë për kontaktet e dikurshme të saj me multimilionerin.
Në Francë ish-ministri i Kulturës Jack Lang – po ashtu për shkak të kontakteve me Epstein – dha dorëheqjen nga posti si president i Institutit të Botës arabe (IMA) . “Ai ka marrë një vendim të përgjegjshëm”, tha presidenti Emmanuel Macron. Njëkohësisht ai tërhoqi vëmendjen për “nxitjen e teorive të konspiracionit”.
Qeveria e Gjermanisë, sipas të dhënave të saj, i ndjek me “vëmendje” zhvillimet lidhur me dosjet Epstein. Zëdhënësi qeveritar në Berlin Stefan Kornelius tha: “Ne shohim, se çfarë po del në pah në vendet e tjera si dhe pasojat politike.” Qeveria federale megjithatë nuk “është autoritet hetimor” dhe nuk ka asnjë arsye për të analizuar sitematikisht dosjet Epstein. Zëdhënësi Kornelius tha, se nuk ka dijeni për ndonjë rast relevant penal lidhur me këto dosje nga Gjermania.
Marrë nga AFP
