Irani po përjeton momentet vendimtare përballë një sulmi të mundshëm izraelit dhe po bën përpjekjet e fundit për ta parandaluar një gjë të tillë.
Burime diplomatike për prestigjiozen amerikane CNN, bëjnë me dije se Teherani po bën një diplomaci intensive për të bindur shtetet e Gjirit Persik, aleatë me SHBA-në, që të parandalojnë një përshkallëzim të situatës.
Ankthi i Iranit buron nga pasiguria nëse SHBA mund ta bindë Izraelin të mos godasë objektet bërthamore dhe objektet e naftës iraniane, dhe fakti që milicia e tij më e rëndësishme përfaqësuese në rajon, Hezbollahu, është dobësuar ndjeshëm nga operacionet ushtarake izraelite në javët e fundit, citojnë burimet për CNN.
Aleatët e Gjirit të SHBA-së, duke përfshirë Emiratet e Bashkuara Arabe, Bahreinin dhe Katarin, i kanë shprehur gjithashtu shqetësimin SHBA-së për një sulm të mundshëm ndaj objekteve të naftës iraniane, të cilat mund të krijojnë ndikime negative ekonomike dhe mjedisore për të gjithë rajonin, tha një diplomat arab për CNN.
Kabineti i sigurisë i Izraelit nuk ka marrë ende një vendim se si të vazhdojë, tha një zyrtar izraelit për CNN. Dhe ndërsa hendeku midis pozicioneve të SHBA-së dhe Izraelit po ngushtohet, ai mund të mos mbetet i tillë, tha një zyrtar amerikan, shkruan A2.
Sakaq, SHBA ka nxituar të armatosë aleatin e saj në Lindjen e Mesme, Emiratet e Bashkuara Arabe. SHBA miratoi shitjet e municioneve për sisteme të shumta raketahedhëse me vlerë 1.2 miliardë dollar. Shitja e raketave GMLRS dhe ATACMS “do të mbështesë objektivat e politikës së jashtme dhe të sigurisë kombëtare të SHBA-së duke ndihmuar në rritjen e sigurisë së një partneri të rëndësishëm rajonal”, tha Agjencia e Bashkëpunimit për Mbrojtjen dhe Sigurinë e SHBA. Po ashtu SHBA e ka pajisur Emiratet edhe me municioni i uraniumi e cila është elementi radioaktiv i cili përdoret për t’i dhënë raketave fuqi të veçantë depërtuese.
