Portugalia mban zi për 15 viktimat e aksidentit të tramvajit elektrik në kryeqytetin Lisbonë, Portugali. Qeveria e shpalli të enjten (04.09.) ditë zie kombëtare, në të gjithë vendin . Tramjavji, “Elevador da Glória” një atraksion i njohur turistik, doli nga shinat të mërkurën në mbrëmje për arsye që ende nuk janë të qarta dhe u përplas me një ndërtesë. Sipas autoriteteve, të paktën 15 persona u vranë dhe 18 të tjerë u plagosën në aksident. Besohet se midis viktimave ka edhe shtetas të huaj. Pesë prej të plagosurve janë në gjendje të rëndë, sipas punonjësve të shpëtimit. Tramvaji ka pasur vend për rreth 40 pasagjerë, por nuk ishte plotësisht i zënë.
Carris: Janë respektuar “protokollet e kontrollit teknik”
Duke cituar një dëshmitar okular, stacioni televiziv SIC raportoi se tramvaji “me shpejtësi të plotë” eci në rrugën e pjerrët dhe goditi një ndërtesë. Gruaja dëshmitare tha, se “ai u përplas me forcë brutale dhe u shemb si një kuti kartoni, nuk kishte frena”. Sipas SIC Notícias, që iu referua operatorit hekurudhor, ngecja e frenave dyshohet si shkak i aksidentit. Nëpunës nga departamenti i policisë kriminale në Lisbonë anë në vendngjarje dhe kanë filluar hetimet.
Një aksident i tillë me tramvajin elektrik nuk kishte ndodhur kurrë më parë në Lisbonë. Presidenti portugez Marcelo Rebelo de Sousa shprehu dhimbje të thellë për aksidentin dhe bëri thirrje për një hetim të shpejtë. Presidentja e Komisionit Evropian Ursula von der Leyen shprehu ngushëllimet e saj familjeve të viktimave. Tramvaji e kishte filluar punën në vitin 1885, në vitin 1915 kaloi në tramvaj elektrik. Sipas kompanisë kujdestare, Carris, janë respektuar “protokollet e kontrollit teknik”.
Marrë nga Reuters
