Performanca financiare e bizneseve ka qenë pozitive gjatë periudhës të gjashtëmujorit të dytë të 2024. Sipas vrojtimit “Mbi gjendjen financiare dhe ngarkesën me borxh të ndërmarrjeve”, rreth 93% e ndërmarrjeve të vrojtuara gjatë periudhës kanë operuar me fitim. Ecuria e shitjeve vlerësohet pozitive dhe në rritje krahasuar me periudhën e kaluar dhe me një vit më parë.
Sa iu përket sfidave të aktivitetit gjatë periudhës, ndërmarrjet e vogla dhe ato të mesme kanë cilësuar “konkurrencën” dhe “gjetjen e tregut”, ndërsa ndërmarrjet e mëdha kanë veçuar “kostot e financimit” dhe “disponueshmërinë e stafit”.
Pesha e ndërmarrjeve që kanë hua për të paguar nuk ka treguar ndryshim të rëndësishëm gjatë periudhës. Rreth 36% e ndërmarrjeve deklarojnë se kanë aktualisht hua për të paguar. Kjo peshë ka shënuar një rënie prej 1 p.p. krahasuar me gjashtëmujorin e kaluar, por është rritur me 0.3 p.p. krahasuar me një vit më parë.
Rreth 84% e ndërmarrjeve e konsiderojnë të përshtatshëm nivelin e tyre të huamarrjes, por ndërmarrjet e vogla vijojnë të shfaqin kërkesë më të lartë për financim. Raporti “hua/kapital” ka shënuar rritje për totalin e ndërmarrjeve të vrojtuara krahasuar me gjashtëmujorin e kaluar.
Rreth 79% e ndërmarrjeve raportojnë se vlera totale e huasë rezulton afërsisht sa gjysma e kapitalit të ndërmarrjes, 14% deklarojnë se është pothuaj e njëjtë me vlerën e kapitalit dhe prej 7% deklarojnë që kjo vlerë e tejkalon atë të kapitalit, çka rezulton në një raport mesatar “hua/kapital” prej 88%.
Ky raport është rritur krahasuar me periudhën paraardhëse, veçanërisht në rastin e ndërmarrjeve të mesme, ku rreth 30% e tyre shprehen se huaja është e barabartë ose tejkalon vlerën e kapitalit.
Në nivel sektorial, ngarkesa me borxh ka shënuar rritje krahasuar me periudhën e kaluar në rastin e sektorëve të industrisë dhe shërbimeve, dhe rënie në rastin e sektorëve të ndërtimit dhe tregtisë. Sektori i shërbimeve vijon të mbetet sektori me vlerën më të lartë të huas ndaj kapitalit, ku rreth 28% e ndërmarrjeve kanë deklaruar se kjo vlerë është e barabartë ose tejkalon vlerën e kapitalit.
Huaja me koston më të lartë në terma të të ardhurave vlerësohet tek ndërmarrjet e mëdha, 28% e të cilave deklarojnë se shërbimi i huasë tejkalon 20% të të ardhurave të tyre.
Marrë nga Ekofin.al
