Pas rritjes së shënuar në mars, treguesi i ndjesisë ekonomike, që mat perceptimet e bizneseve dhe qytetarëve për ecurinë e ekonomisë, ka shënuar një rënie me 0.8 pikë në prill. Rënia e këtij treguesi i ndikua më së shumti nga rënia e ndjeshme e sektorit të industrisë, si edhe nga treguesi i besimit konsumator. Të gjithë treguesit e tjerë të besimit, në sektorët e ndërtimit, shërbimeve dhe tregtisë, shënuan rritje, por nuk arritën të kompensonin rënien e treguesve në dy sektorët e tjerë.
Treguesi i besimit të industrisë ra me 6.7 pikë përqindje në muajin prill, i ndikuar nga vlerësimet e përkeqësuara për kontratat porositëse në vend dhe veçanërisht për ato nga eksportet. Ky tregues ka zbritur gjithashtu nën mesataren historike. Në terma të pritjeve për të ardhmen, bizneseve të këtij sektori presin punësim në rritje dhe çmime në rënie.
Treguesi i besimit në ndërtim u rrit me 1.3 pikë përqindje në muajin prill, për të dytin muaj me radhë. Ky tregues qëndron ndjeshëm mbi mesataren afatgjatë. Rritja e tij u ndikua kryesisht nga vlerësimet më të larta për nivelin e porosive aktuale, ndërkohë që prirjet për punësimin dhe ato për çmimet në të ardhmen janë në rritje.
Treguesi i besimit në shërbime u rrit me vetëm 0.5 pikë përqindje, në muajin prill. Gjithsesi, ai mbetet mbi mesataren afatgjatë të tij. Të dy komponentët përbërës të treguesit, ecuria aktuale e aktivitetit si dhe niveli i kërkesës, kanë regjistruar rritje. Edhe besimi në tregti u rrit, me rreth 0.8 pikë përqindje, ndikuar kryesisht nga vlerësimet optimiste për punësimin në të ardhmen.
Treguesi i besimit konsumator ra me 1.3 pikë përqindje. Përkeqësimi i këtij treguesi u ndikua nga rënia e pothuajse të gjithë balancave përbërëse të treguesit, përkatësisht: pritjeve për situatën e përgjithshme ekonomike, situatën financiare dhe blerjet aktuale në shuma të mëdha.
Marrë nga Ekofin.al
