3953 aplikime u paraqitën pranë Agjencisë së Eficiencës së Energjisë për të përfituar nga skema për subvencionimit në masën 70% të paneleve diellore për ngrohjen e ujit, teksa 2000 prej tyre u shpallën fitues. Ky dikaster ka njoftuar përmbylljen e shqyrtimit të kërkesave, teksa aktualisht një pjesë e familjeve përfituese kanë nisur instalimin e impianteve.
Në total janë 850 familje që tashmë i kanë instaluar impiantet, teksa pjesa tjetër janë në proces për përzgjedhjen e kompanisë që do iu ofrojë shërbimin për blerjen e pajisjeve dhe montimin e tyre, sipas listës së vënë në dispozicion nga Agjencia e Eficiencës së Energjisë.
Në total janë 14 kompani të cilat mund të përzgjidhen nga familjet e kualifikuara e që do përfitojnë nga skema e subvencionimit në masën 70% të paneleve diellore për ngrohejn e ujit. Secila prej tyre ka të listuara ofertat sipas madhësisë së impiantit dhe çmimit përkatës, që variojnë nga 75 mijë lekë që është më i ulti, deri në 168 mijë lekë që është impainti më i shtrenjtë.
Ndërkaq, referuar skemës në rast se një familje zgjedh të instalojë një panel që kushton 168 mijë lekë, atëhere do të duhet të paguajë nga buxheti personal 50,400 lekë, ndërsa pjesa tjetër prej 117,600 lekë do të subvencionohet nga shteti.
Ky është viti i dytë i aplikimit të skemës për nxitjen e përdorimit të paneleve diellore për ngrohjen e ujit nga klientët familjarë.
Kjo skemë synon reduktimin e konsumit të energjisë elektrike, përmirësimin e furnizmit me ujë të ngrohtë sanitar, si dhe reduktimin e emetimeve të CO2. Sipas një studimi të realizuar nga Enti Rregullator i Energjisë kostoja për ngrohjen e ujit zë 19% të faturës së energjisë elektrike.
Marrë nga ScanTv.al
