Gjatë vitit 2024, për prokurimet publike rezultojnë 4,836 njoftime fituesish të procedurave të shpallura.
Nga të dhënat që gjenerohen nga Sistemi i Prokurimit Elektronik ky numër përfshin tipin e kontratave shërbim, mallra dhe punë publike.
Kontratat e “Mallrave” përbëjnë numrin më të lartë të procedurave të përfunduara me fitues, konkretisht me 2,668 fitues ose 55% të totalit të tyre, më tej “Shërbime”, me 1,259 fitues ose 26% të totalit të fituesve, dhe “Punë publike”, me 909 fitues ose 19% të totalit të fituesve.
Për kontratën e mallrave, vlera më e lartë rezulton në procedurën e hapur mbi kufirin e lartë monetar me vlerë mbi 29 miliardë lekë, ndërsa po në të njëjtën procedurë fondi limit në kontratën e shërbimeve është mbi 21 miliardë lekë. Në të kundërt fondi limit më i madh për kontratën e “Punëve publike” rezulton në procedurën e hapur me mbi 61 miliardë lekë.
Sa i takon raportit në vlerë, vlera më e madhe është fituar në procedurat për “Punë Publike”, mbi 121 miliardë lekë, ndjekur nga procedurat e prokurimit për mallra me 41 miliardë lekë dhe më pas për shërbime në vlerën mbi 36 miliardë lekë.
Krahasimisht me vitin 2023 rezultojnë 829 procedura të përfunduara me fitues më shumë në vitin 2024, si dhe gjithashtu vlera e këtyre procedurave është me e lartë. Kështu, rezulton se vlera totale e fituar në vitin 2024 kapërcen shifrën e 171 miliardë lekëve, ndërkohë që në vitin 2023 kjo vlerë është mbi 111 miliardë lekë.
Sipas raportit, numri më i lartë i shpalljes së njoftimit të fituesve është në muajin Dhjetor 2024 (me 605 shpallje) dhe në përgjithësi 6 mujori i dytë i vitit ka një numër në rritje të shpalljes së njoftimit të fituesve.
Nga të dhënat e pasqyruara në raport rezulton se numri më lartë i kontratave të nënshkruara/MK është tipi “Mallra” me 2,406 kontrata ose 56% të kontratave në total, më tej “Shërbime”, me 1,090 kontrata ose 25% të totalit, si dhe “Punë publike”, me 811 kontrata ose 19% të totalit.
Marrë nga Ekofin.al
