Dhjetë ditë pas vendosjes së gjobave ndaj disa televizioneve në vend, kryetarja e Autoritetit të Mediave Audiovizive (AMA), Armela Krasniqi, ka reaguar përmes një postimi në rrjetet sociale, duke kundërshtuar pretendimet se masat administrative përbëjnë censurë.
Në reagimin e saj, Krasniqi shprehet se mediat nuk mund të përjashtohen nga përgjegjësia, ndonëse deklaratat problematike janë bërë nga të ftuarit dhe jo nga gazetarët.
“Duhet shqyrtuar i gjithë konteksti editorial: Reagimi i moderatorit dhe nëse transmetimi informon publikun apo kontribuon në përhapjen dhe normalizimin e thirrjeve për dhunë”, shkruan Krasniqi, ndërsa rendit disa prej deklaratave të transmetuara në ekranet e televizioneve të gjobitura.
Krasniqi hedh poshtë edhe akuzat se masat lidhen me qëndrimet antiqeveritare.
“Të jesh kritik ndaj qeverisë nuk të përjashton nga zbatimi i ligjit. Të marrësh një sanksion për një përmbajtje të caktuar nuk do të thotë automatikisht se je ndëshkuar për qëndrimin tënd politik”, shkruan ajo.
Reagimi i kryetares së AMA-s vjen pas kundërshtimeve të disa mediave dhe gazetarëve ndaj vendimeve të institucionit.
Gjatë javës së kaluar, kur njoftimet për gjobat mbërritën në redaksitë e mediave, Shteg.org kërkoi një qëndrim nga AMA dhe vetë Armela Krasniqi. Përgjigjja e institucionit ishte një argumentim me karakter institucional, pa iu përgjigjur drejtpërdrejt pyetjeve të ngritura nga redaksia.
Ndërkohë, sipas burimeve të Shteg.org pranë Komisionit Parlamentar për Median, javën e ardhshme Krasniqi pritet të raportojë përpara deputetëve, ku do të përballet me shqetësimet dhe kundërshtimet e mediave lidhur me gjobat e vendosura.
Për drejtuesen e këtij Komisioni, Jorida Tabaku, vendimmarrja lidhet me shqetësimet e përsëritura të Komisionit Europian për pavarësinë e AMA-s, veçanërisht për mënyrën e emërimit të anëtarëve të bordit dhe mundësinë e ndikimit politik e ekonomik mbi institucionin.
Gjobat, në vlerën 100 mijë lekë secila, janë vendosur ndaj disa televizioneve për deklarata të transmetuara në emisionet e tyre. KLAN TV është gjobitur për një deklaratë të gazetarit Armand Shkullaku në emisionin “Opinion”, ndërsa Vizion Plus për një deklaratë të Andi Bushatit në emisionin “Të Paekspozuarit”.
Masa administrative janë vendosur edhe për emisionin e Erla Mëhillit në Euronews Albania, emisionin e Beti Njumës në News24, Ora News dhe emisionin e Çim Pekës në Syri TV.
Por për gazetarët dhe drejtuesit e emisioneve të prekura, debati shkon përtej vlerës financiare të gjobave. Shqetësimi kryesor lidhet me precedentët që këto vendime mund të krijojnë për lirinë editoriale dhe mënyrën se si televizionet do të trajtojnë debatet politike në të ardhmen.
Sipas tyre, sanksionet mund t’i bëjnë redaksitë më të rezervuara në përzgjedhjen e të ftuarve, moderimin e debateve dhe trajtimin e temave të ndjeshme politike, duke krijuar një klimë vetëcensure.
Gazetari Blendi Fevziu e konsideron këtë qasje një formë të tërthortë censure. Sipas drejtuesit të emisionit “Opinion”, një televizion mund të detyrohet të ndryshojë përzgjedhjen e të ftuarve, jo për shkak të cilësisë së debatit, por nga frika se një deklaratë e tyre mund të sjellë një tjetër gjobë.
Edhe Erla Mëhilli, drejtuese e emisionit “Now” në Euronews Albania, ngre shqetësimin për pasojat që këto vendime mund të kenë në punën e redaksive. Sipas saj, masa të tilla mund të krijojnë një klimë vetëcensure, veçanërisht në emisionet politike që transmetohen drejtpërdrejt, ku moderatorët nuk kanë mundësi të parashikojnë çdo deklaratë të të ftuarve.
Në fund të reagimit të saj, Krasniqi thekson se të gjobiturit mund të ankimojnë masën administrative dhe se AMA “nuk mund të heshtë përballë shkeljeve vetëm sepse vendimet e saj mund të jenë të papëlqyeshme”.
Marrë nga Shteg.org