Muzika në internet dhe shpërndarja e saj do t’u nënshtrohet rregullave të reja për mbrojtjen e së të drejtës së autorit për të lejuar autorizimin e përdorimit të saj dhe minimizuar shkeljet ndërkufitare.
Ministria e Ekonomisë ka nxjerrë për konsultim publik projektligjin me ndryshimet për të drejtën e autorit.
Sipas relacionit shoqërues, në sektorin e muzikës në internet, ku administrimi kolektiv i të drejtave të autorëve mbi baza territoriale mbetet normë, është thelbësore të krijohen kushte të favorshme për praktika më efektive të autorizimit nga agjencitë e administrimit kolektiv në nivel gjithnjë e më shumë ndërkufitar.
Për këtë arsye, është e përshtatshme të vendosen disa rregulla që përmbajnë kushtet bazë për ofrimin nga agjencitë e administrimit kolektiv të autorizimit shumë territorial të të drejtave të autorëve në veprat muzikore, përfshirë tekstet, për përdorim në internet. Të njëjtat rregulla të autorizimit shumë territorial duhet të zbatohen për të gjitha veprat muzikore, duke përfshirë veprat muzikore të përdorura në veprat audiovizuale.
Ky lloj autorizimi pritet t’u japë përdoruesve një zgjedhje më të gjerë për të përdorur muzikë ose për ta dëgjuar atë në metodën streaming dhe për të inkurajuar zhvillimin e mënyrave të reja të përdorimit të muzikës.
Duke rregulluar formën e autorizimit për platformat e ndryshme të cilat ofrojnë në mënyrë të ligjshme muzikë në internet përtej kufijve të Republikës së Shqipërisë, do të ndikojnë në luftën kundër shkeljeve të të drejtave të autorit në internet.
Gjithashtu, ofruesit e shërbimeve do e kenë më të lehtë të marrin autorizime në mënyrë të ligjshme (duke ulur kostot e transfertave) nga agjencitë e administrimit kolektiv të cilat janë më funksionale dhe më transparente në përshtatje me sfidat e shekullit të 21-të.
Kjo do të lehtësojë përhapjen e shërbimeve të reja, veçanërisht në internet, i cili përbën një treg më vete. Gjithashtu, përdoruesit vendas do të kenë mundësinë e aksesit në një numër shumë më të madh veprash, dhe nga ana tjetër ata vetë do të jenë të njohur nga një numër shumë i gjerë përdoruesish në mbarë botën.
Përdoruesit do të kenë qasje më të lehtë në repertorët kombëtarë si dhe ato ndërkombëtarë për muzikën. Kjo do të lehtësonte aksesin ndërkufitar për përmbajtjet që lidhen me kulturën dhe do të pasuronte kështu diversitetin kulturor.
Sipas relacionit, Shqipëria nuk do të ketë detyrimin e krijimit të një sistemi të veçantë autorizimi shumë territorial për agjencitë e administrimit kolektiv. Megjithatë, është detyrim që, Drejtoria për të Drejtën e Autorit, si struktura përgjegjëse për monitorimin e agjencive, të monitorojë përputhshmërinë me kërkesat e përcaktuara në ligj nga agjencitë e administrimit kolektiv të themeluara në territorin e Republikës së Shqipërisë, për procesin e autorizimit shumë territorial për të drejtat në veprat muzikore në internet.
Drejtoria e të Drejtës së Autorit mund të vendosë sanksione efektive, proporcionale dhe ndëshkuese në rast se nuk respektohen parimet dhe detyrimet e ligjit për të drejtën e autorit.
Marrë nga Ekofin.al
